ហេតុការណ៍កម្រ! ស្ត្រីម្នាក់សម្រាលកូនលើឡានសង្គ្រោះ និងម្នាក់ទៀតសម្រាលបានកូនភ្លោះលើទូក
ខេត្តព្រះវិហារ ៖ មន្ត្រីសុខាភិបាល និងឆ្មបមណ្ឌលសុខភាពរវៀងនៃមន្ទីរសុខាភិបាលខេត្តព្រះវិហារ នៅវេលាម៉ោង២ និង១៤នាទីរំលងអធ្រាត្រ ឈានចូលថ្ងៃទី២៣ ខែសីហា ឆ្នាំ២០២៦ បានយករថយន្តសង្គ្រោះទៅទទួលជួយសង្គ្រោះស្ត្រីមានផ្ទៃពោះម្នាក់ ដែលមានអាការៈឈឺពោះសម្រាលកូន ប៉ុន្តែពេលធ្វើដំណើរតាមផ្លូវ ស្ត្រីរូបនោះមានអាការៈឈឺពោះសម្រាលកូនកាន់តែខ្លាំង ក៏បានសម្រាលកូនលើរថយន្តសង្គ្រោះតែម្តង ក្រោមការជួយសង្គ្រោះពីក្រុមគ្រូពេទ្យជំនាញ ។ ចំណែកម្តាយនិងទារកមានសុវត្ថិភាព ។
លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានថ្លែងកោតសរសើរ និងវាយតម្លៃខ្ពស់ ចំពោះការយកចិត្តទុកដាក់ ការទទួលខុសត្រូវ និងការបំពេញតួនាទីរបស់មន្ត្រីសុខាភិបាល និងឆ្មបនៅតាមមូលដ្ឋាន ជាពិសេសក្រុមការងារមណ្ឌលសុខភាពរវៀង ដែលបានឆ្លើយតបយ៉ាងរហ័ស ចំពោះស្ថានភាពសម្រាលកូនបន្ទាន់ និងអាចជួយសង្គ្រោះមាតា និងទារកបានដោយសុវត្ថិភាព ។
លោកវេជ្ជបណ្ឌិតបានថ្លែងទៀតថា សកម្មភាពសង្គ្រោះបន្ទាន់នេះ បានបង្ហាញឱ្យឃើញពីការត្រៀមខ្លួន និងការទទួលខុសត្រូវខ្ពស់ របស់មន្ត្រីសុខាភិបាលមូលដ្ឋាន ជាពិសេសការឆ្លើយតបបានរហ័ស នៅពេលប្រឈមនឹងស្ថានភាពសម្រាលកូនបន្ទាន់ ដែលអាចកើតឡើងគ្រប់ពេលវេលា និងគ្រប់ទីកន្លែង ។
លោកថា ការងារសុខាភិបាលនៅមូលដ្ឋាន មិនត្រឹមតែជាការផ្តល់សេវាពិនិត្យ និងព្យាបាលជំងឺប៉ុណ្ណោះទេ ប៉ុន្តែត្រូវមានការត្រៀមខ្លួនជានិច្ច ដើម្បីឆ្លើយតបចំពោះគ្រប់ស្ថានភាពបន្ទាន់ ជាពិសេសការសង្គ្រោះស្ត្រីមានផ្ទៃពោះ និងទារក ដែលទាមទារឱ្យមន្ត្រីសុខាភិបាលមានជំនាញ ចំណេះដឹង បទពិសោធន៍ និងការឆ្លើយតបឱ្យបានរហ័ស ។
លោកវេជ្ជបណ្ឌិត គួង ឡូ ឆ្លៀតឱកាសនេះ បានអំពាវនាវដល់ស្ត្រីមានផ្ទៃពោះ និងក្រុមគ្រួសារ ឱ្យចូលរួមយកចិត្តទុកដាក់លើការថែទាំសុខភាពមាតា និងទារក ដោយត្រូវទៅពិនិត្យផ្ទៃពោះតាមកាលកំណត់ មិនត្រូវខកខានការណាត់ជួបជាមួយបុគ្គលិកសុខាភិបាល និងត្រូវរៀបចំផែនការសម្រាលកូនជាមុន ជាពិសេសនៅពេលផ្ទៃពោះជិតគ្រប់ខែ ។
លោកបានថ្លែងបញ្ជាក់ទៀតថា នៅពេលស្ត្រីមានផ្ទៃពោះចាប់ផ្តើមមានសញ្ញាឈឺពោះជាបន្តបន្ទាប់ ត្រូវប្រញាប់បញ្ជូនទៅកាន់មណ្ឌលសុខភាព ឬមន្ទីរពេទ្យដែលនៅជិតបំផុត និងអាចទាក់ទងសេវារថយន្តសង្គ្រោះបន្ទាន់ ដើម្បីកុំឱ្យការពន្យារពេលបង្កហានិភ័យដល់អាយុជីវិតមាតា និងទារក ។
លោកវេជ្ជបណ្ឌិតបានថ្លែងសង្កត់ធ្ងន់ថា ការសម្រាលកូនដោយសុវត្ថិភាព គឺត្រូវការការចូលរួមពីស្ត្រីមានផ្ទៃពោះ ក្រុមគ្រួសារ និងបុគ្គលិកសុខាភិបាល ដូច្នេះការរៀបចំទុកជាមុន និងការទៅទទួលសេវាសុខាភិបាលឱ្យបានទាន់ពេល គឺជាកត្តាសំខាន់ ក្នុងការការពារជីវិតមាតា និងទារក ។ តាមប្រភពខាងលើនេះ មិនបានឱ្យដឹងពីអត្តសញ្ញាណស្ត្រីឆ្លងទន្លេនេះទេ ហើយក៏មិនដឹងថា ទារកដែលសម្រាលពេលនេះ ជាកូនទីប៉ុន្មានឡើយ ៕
ប្រភព៖ កោះសន្តិភាព
