អាជ្ញាធរតួកគី ចាប់ឃាត់ខ្លួនមនុស្សជាង ១០០នាក់ដែលធ្វើបាតុកម្មប្រឆាំងណាតូ មុនកិច្ចប្រជុំកំពូលណាតូ
គណបក្សកុម្មុយនីស្តតួកគី (TKP) ដែលរៀបចំធ្វើបាតុកម្មប្រឆាំងអង្គការណាតូ បានថ្លែងនៅក្នុងសេចក្តីថ្លែងការណ៍មួយកាលពីថ្ងៃ ទី៥ ខែកក្កដា ថា អាជ្ញាធរតួកគី បានចាប់ឃាត់ខ្លួនមនុស្សជាង ១០០នាក់ ដែលបានចូលរួមក្នុងក្បួនដង្ហែបាតុកម្ម នៅមុនកិច្ចប្រជុំកំពូលរបស់សម្ព័ន្ធភាពយោធាមួយនេះ ដែលនឹងចាប់ផ្តើមនៅក្នុងទីក្រុងអង់ការ៉ា (Ankara) នៅសប្តាហ៍នេះ។
យោងសារព័ត៌មាន Reuters នៅក្នុងសេចក្តីថ្លែងការណ៍មួយ គណបក្ស TKP បានឲ្យដឹងថា ខ្លួនបានរៀបចំក្បួនដង្ហែបាតុកម្មនៅទីលាន Kizilay កណ្តាលទីក្រុងអង់ការ៉ានៃប្រទេសតួកគី ដោយសមាជិកបក្សជាង ១០០នាក់ រួមទាំងថ្នាក់ដឹកនាំផងនោះ ត្រូវបានឃាត់ខ្លួន។ សកម្មភាពនៅក្នុងវីដេអូ បានបង្ហាញពីក្រុមបាតុករគ្រវីទង់ជាតិ និងស្រែកខ្លាំងៗនូវពាក្យស្លោកនានា រួមមាន « ណាតូជាឃាតក ចេញពីប្រទេសយើងទៅ» និង «មិនផ្តល់ផ្លូវឲ្យណាតូឡើយ» ខណៈដែលប៉ូលិសបង្ក្រាបកុបកម្មបានលូកដៃជ្រៀតជ្រែក ដោយប្រើឧស្ម័នបង្ហូរទឹកភ្នែកដើម្បីបំបែកហ្វូងមនុស្ស។
នៅក្នុងបាតុកម្មដាច់ដោយឡែកមួយទៀត ដែលរៀបចំដោយគណបក្ស TKP ដែរនោះ មនុស្សរាប់រយនាក់បានដើរក្បួនពីទីលាន Taksim ក្នុងទីក្រុងអ៊ីស្តង់ប៊ុល ទៅកាន់តំបន់ Dolmabahce។ ក្រៅពីនេះ ក៏មានបាតុកម្មដាច់ដោយឡែកចំនួនពីរផ្សេងទៀត ដែលរៀបចំឡើងដោយក្រុមឆ្វេងនិយមនៅក្នុងស្រុក Kadikoy ផងដែរ។ ទោះបីជាមានវត្តមានប៉ូលិសយ៉ាងច្រើនកុះករក៏ដោយ ក៏មិនមានការប៉ះទង្គិចគ្នាណាមួយកើតឡើងអំឡុងពេលធ្វើបាតុកម្មនៅក្នុងទីក្រុងអ៊ីស្តង់ប៊ុលនោះទេ។
អគ្គលេខាធិការគណបក្ស TKP លោក Kemal Okuyan បាននិយាយថា «យើងបានជួបជុំគ្នានៅថ្ងៃនេះក្នុងតំបន់ជាច្រើននៃប្រទេសតួកគី ដើម្បីតវ៉ាប្រឆាំងនឹងណាតូ។ យើងបាននិយាយថា យើងនឹងមិនប្រគល់ទីក្រុងអង់ការ៉ាទៅឲ្យអ្នកគាំទ្រណាតូឡើយ ហើយយើងនឹងមិនបណ្តោយឲ្យទីក្រុងអង់ការ៉ានៅស្ងៀមនោះទេ។ យើងបានសម្រេចការសន្យានោះហើយ»។
ទោះជាយ៉ាងណា រដ្ឋាភិបាលមិនទាន់បានធ្វើអត្ថាធិប្បាយភ្លាមៗ ជុំវិញការធ្វើបាតុកម្ម ឬការឃាត់ខ្លួនទាំងនេះនៅឡើយទេ។
កាលពីខែមុន អាជ្ញាធរបានចាប់ខ្លួនមនុស្សចំនួន ១០៣នាក់ ដែលជាផ្នែកមួយនៃការវាយឆ្មក់ប្រឆាំងនឹងភេរវកម្មនៅក្នុងទីក្រុងអង់ការ៉ា ដែលនៅក្នុងនោះមនុស្សសរុបចំនួន ២២៥នាក់ត្រូវបានឃាត់ខ្លួន។ ដោយឡែក ប្រព័ន្ធផ្សព្វផ្សាយបានរាយការណ៍កាលពីថ្ងៃអាទិត្យថា មនុស្ស ៣៩នាក់ផ្សេងទៀត រួមមានអ្នកសារព័ត៌មានមកពីស្ថាប័នឯករាជ្យ សកម្មជន និងអ្នកសិក្សាស្រាវជ្រាវ ត្រូវបានឃាត់ខ្លួនក្នុងការវាយឆ្មក់ប្រឆាំងនឹងភេរវកម្មនៅទូទាំងប្រទេស។
សូមជម្រាបជូនថា តួកគីនឹងធ្វើជាម្ចាស់ផ្ទះទទួលស្វាគមន៍បណ្តាមេដឹកនាំមកពីប្រទេសជាសមាជិកទាំង ៣២ ព្រមទាំងមន្ត្រីជាន់ខ្ពស់មកពីដៃគូរបស់ណាតូ នៅក្នុងទីក្រុងអង់ការ៉ា សម្រាប់កិច្ចប្រជុំកំពូលមួយដែលនឹងប្រព្រឹត្តទៅនៅថ្ងៃអង្គារ និងថ្ងៃពុធខាងមុខ។ ជាក់ស្ដែង អាជ្ញាធរបានបង្កើនវិធានការសន្តិសុខយ៉ាងតឹងរ៉ឹងនៅទូទាំងរដ្ឋធានីរបស់តួកគី មុនពេលជំនួបនេះចាប់ផ្តើម ដោយក្នុងនោះមានការហាមឃាត់ការធ្វើបាតុកម្ម ការដាក់រនាំងបិទផ្នែកធំៗនៃទីក្រុង និងការបិទផ្លូវថ្នល់នានា៕