រាជរដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជាសម្រេចបាននូវសមិទ្ធផលធំៗជាច្រើន
ភ្នំពេញ៖ ថ្ងៃនេះប្រជាជនកម្ពុជាទូទាំងប្រទេស បានសម្តែងក្តីសប្បាយរីករាយយ៉ាងក្រៃលែងចូលរួមប្រារព្ធពិធីអបអរសាទរខួបលើកទី៧៤ ថ្ងៃបង្កើតគណបក្សប្រជាជនកម្ពុជា ដែលនៅ គ្រាដំបូងមានឈ្មោះថា «បក្សប្រជាជនបដិវត្តន៍ខ្មែរ» ដែលត្រូវ បង្កើតឡើងនៅថ្ងៃទី២៨ ខែមិថុនា ឆ្នាំ១៩៥១។
ថ្ងៃទី២៨ ខែមិថុនា ឆ្នាំ២០២៥នេះរាជរដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជាកាន់តែទទួលបាននូវ សមិទ្ធផលធំៗជាច្រើនទៀត ក្នុងនោះគឺការការពារបានសន្តិភាព ស្ថិរភាពនយោបាយ និងការអភិវឌ្ឍ។
រាជរដ្ឋាភិបាលនីតិកាលទី៧ នៃរដ្ឋសភា បានប្រកាសនូវកម្មវិធី នយោបាយរបស់ខ្លួន ដែលត្រូវបានកសាងលើ មូលដ្ឋានកម្មវិធីនយោបាយរបស់គណបក្ស និងបានដាក់ចេញយុទ្ធសាស្ត្រ បញ្ចកោណ-ដំណាក់កាលទី១ (២០២៣-២០២៨) ដើម្បីកំណើន ការងារ សមធម៌ ប្រសិទ្ធភាព និងចីរភាព សំដៅការពារ ថែរក្សា ពូនជ្រំសមិទ្ធផលជាតិនិង កសាងមូលដ្ឋានឆ្ពោះទៅសម្រេចចក្ខុវិស័យ កម្ពុជាប្រែក្លាយជាប្រទេសមានចំណូលមធ្យមកម្រិតខ្ពស់នៅ ឆ្នាំ២០៣០ និង ប្រែក្លាយជាប្រទេសមានចំណូលខ្ពស់ឆ្នាំ២០៥០។
គួររំលេចឱ្យដឹងថា ក្នុងឆ្នាំ២០២៤ កន្លងទៅនេះ សេដ្ឋកិច្ចកម្ពុជាត្រូវ បានប៉ាន់ស្មានថា សម្រេចបានកំណើនប្រមាណ ៦ភាគរយ។ ទំហំពាណិជ្ជកម្មអន្តរជាតិកម្ពុជាក្នុងឆ្នាំ២០២៤ មានសរុបចំនួន ៥៥,៤ ប៊ីលាន ដុល្លារអាម៉េរិក កើនឡើង១៥,៦៦ភាគរយ បើធៀបនឹងឆ្នាំ២០២៣។ ការនាំចេញមានចំនួន ២៦,៧ ប៊ីលានដុល្លារ កើនឡើង១៣,៦១ភាគរយ និងការនាំចូលមានចំនួន ២៨,៧ប៊ីលានដុល្លារ កើនឡើង ១៧,៦៣ភាគរយ បើធៀបនឹងឆ្នាំ២០២៣។ ទុនបម្រុងអន្តរជាតិបន្តស្ថិតក្នុងកម្រិតខ្ពស់ ប្រមាណជាង ២២ប៊ីលានដុល្លារ។ ចំពោះអត្រាប្តូរប្រាក់មាន ស្ថិរភាព ក្នុងរង្វង់ ៤០២៤រៀល/ដុល្លារ ខណៈអត្រាអតិផរណាមធ្យមប្រចាំឆ្នាំ មានកំណើនថមថយមកត្រឹម០,៨ភាគរយ។
រាជរដ្ឋាភិបាលនៅបន្តដំឡើងប្រាក់បៀវត្សជូនមន្ត្រីរាជការ និង កងកម្លាំងប្រដាប់អាវុធ ដោយបច្ចុប្បន្នប្រាក់បៀវត្សអប្បបរមា មានចំនួន ១លាន ៣៩ម៉ឺនរៀល និងបន្តកាត់បន្ថយ គម្លាតប្រាក់ សោធនរវាងអ្នកចូលនិវត្តន៍ចាស់ និងថ្មី។ ជាមួយគ្នានេះ ក្រុមប្រឹក្សា អភិវឌ្ឍន៍កម្ពុជា បានអនុញ្ញាតឱ្យក្រុមហ៊ុនវិនិយោគ លើគម្រោងថ្មី និងគម្រោងពង្រីកផលិតកម្មសរុបចំនួន ៤១៤ គម្រោង ដែលមានទុន វិនិយោគសរុបប្រមាណ ៦,៩ ប៊ីលានដុល្លារ ដែលអាចបង្កើតការងារចំនួន ៣២៤ ៦២៤កន្លែង។ ទន្ទឹមនេះ ចំនួនរោងចក្រសរុបមានចំនួន ២ ៤២៥រោងចក្រ និងបង្កើតការងារ ១ ១៦០ ១៨១ នាក់ និងចំនួន សហគ្រាសធុនតូច មធ្យម និងសិប្បកម្មសរុបមាន៤៣ ៩៧០មូលដ្ឋាន ដែលបង្កើតការងារ ៤៧៦ ២២៣នាក់។
រាជរដ្ឋាភិបាលក៏បានដំឡើងប្រាក់ឈ្នួលអប្បបរមារបស់កម្មករ និយោជិតផ្នែកវាយនភណ្ឌកាត់ដេរ ផលិត ស្បែកជើង និងផលិត ផលិតផលធ្វើដំណើរនិងកាបូប ដល់ ២០៨ដុល្លារ/ខែ សម្រាប់ ឆ្នាំ២០២៥ បូករួមនឹងអត្ថប្រយោជន៍ជាកាតព្វកិច្ច និងអត្ថប្រយោជន៍ ផ្សេងៗពីគោលនយោបាយគាំពារសង្គម។
រាជរដ្ឋាភិបាលកម្ពុជាបន្តសម្រេចបានសមិទ្ធផលជាទីមោទនៈ ដូចជា ការរៀបចំព្រឹត្តិការណ៍ជាប្រវត្តិសាស្ត្រនៃពិធីអបអរសាទរការបើក ការដ្ឋានសាងសង់ «ព្រែកជីកហ្វូណនគេជោ» ។ការបោះឆ្នោតជ្រើស តាំងសមាជិកព្រឹទ្ធសភានីតិកាលទី៥ និងការបោះឆ្នោតជ្រើស រើសក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី៤។
អ្វីដែលគួរជាទីមោទនភាពនោះ គឺរហូតមកដល់បច្ចុប្បន្ន កម្ពុជាបានផ្លាស់ប្តូរមុខមាត់របស់ខ្លួនយ៉ាងឆាប់រហ័ស បើធៀបទៅនឹងប្រទេសដែលទើបងើបពីសង្គ្រាមដំណាលគ្នាជាមួយកម្ពុជា។ យើងបានផ្លាស់ប្តូរពីសង្គមក្រីក្រ និងងាយមានជម្លោះ ទៅជាសង្គមមួយដែលមានស្ថិរភាព សន្តិភាព និងសុវត្ថិភាព ហើយប្រជាជនយើងចាប់ផ្តើមទទួលផ្លែផ្កាពីសន្តិភាព និងការអភិវឌ្ឍ។ អត្រាភាពក្រីក្រត្រូវបានកាត់បន្ថយនៅក្នុងរង្វង់ ១០ភាគរយ ក្នុងឆ្នាំ២០១៩ ប៉ុន្តែបានឡើងខ្ពស់ក្នុងពេលមានវិបត្តិជំងឺកូវីដ-១៩។ ទោះជាយ៉ាងនេះក្តី, ការដាក់ចេញ និងការអនុវត្តវិធានការអន្តរាគមន៍ ប្រកបដោយប្រសិទ្ធភាពខ្ពស់ ទាំងក្នុងការគ្រប់គ្រងវិបត្តិ ទាំងក្នុងការរក្សាលំនឹងជីវភាពរស់នៅរបស់ប្រជាជន បានជួយបង្កើនអំណាចទិញរបស់ប្រជាជនមកវិញ និងធ្វើឱ្យអត្រាភាពក្រីក្រធ្លាក់ចុះមកត្រឹម ១៧,៩៨ភាគរយ ក្នុងឆ្នាំ២០២៤។
កម្ពុជាក៏កំពុងឈានទៅការបញ្ចប់ឋានៈជាប្រទេសមានការអភិវឌ្ឍតិចតួចដោយពេញលេញនៅឆ្នាំ២០២៩ ខាងមុខ។ កម្ពុជាបានប្រែក្លាយពីប្រទេសដែលមានកង្វះខាតប្រាក់ចំណូលធ្ងន់ធ្ងរ ហើយពឹងផ្អែកលើដៃគូអភិវឌ្ឍន៍ ដើម្បីទទួលបានហិរញ្ញប្បទានពីរភាគបីនៃថវិកាជាតិ ទៅជាប្រទេសដែលមានសមត្ថភាពគ្រប់គ្រងថវិកាជាតិបានដោយភាពម្ចាស់ការ, ថែមទាំងមានទុនបម្រុង ដើម្បីការពារសេដ្ឋកិច្ចជាតិ និងលំនឹងជីវភាពប្រជាពលរដ្ឋ, ទប់ទល់នឹងវិបត្តិ និងគ្រោះមហន្តរាយផ្សេងៗ។
កម្ពុជាបានប្រែក្លាយពីប្រទេសដែលនៅឯកោ និងទទួលរងទណ្ឌកម្មដោយសហគមន៍អន្តរជាតិ ទៅជាប្រទេសដែលធ្វើសមាហរណកម្មយ៉ាងស៊ីជម្រៅនៅក្នុងតំបន់ និងពិភពលោក, ក្លាយជាប្រទេសដែលអាចបញ្ជូនកងរក្សាសន្តិភាព និងចូលរួមយ៉ាងសកម្ម នៅក្នុងរបៀបវារៈសន្តិភាព ទាំងក្នុងតំបន់ និងក្រៅតំបន់ថែមទៀតផង។
រាជរដ្ឋាភិបាលកម្ពុជាក្រោមការដឹកនាំរបស់គណបក្សប្រជាជនកម្ពុជានឹងកាន់តែទទួលបាននូវសមិទ្ធផលធំៗជាច្រើនទៀត នោះគឺការការពារបូរណភាពទឹកដី ឯករាជ្យ អធិបតេយ្យភាព សន្តិភាព ស្ថិរភាពនយោបាយ និងការអភិវឌ្ឍ៕
