ផ្ទុះគ្រា.ប់បែ.កកក្រើកថៃភាគខាងត្បូងបណ្ដាលឱ្យរ.បួ.សយ៉ាងតិច៧នាក់
ទីក្រុងបាងកក៖ ប្រទេសថៃកំពុងតែមានប្រផ្នូលមិនល្អ។ នៅពេលមានចលនាបាតុកម្មទាមទារឱ្យលោកស្រីផែថងថានចុះពីតំណែងនាយករដ្ឋមន្ត្រីក៏មានហេតុការណ៍ផ្ទុះគ្រាប់បែកកក្រើកថៃភាគខាងត្បូង។ កាសែតបាងកកប៉ុស្តិ៍ចុះផ្សាយថាមនុស្ស៧នាក់រងរបួស ក្នុងនោះ៥នាក់ជាអ្នកលក់ដូរ និង២នាក់ជានគរបាលដោយសារការផ្ទុះគ្រាប់បែក៣គ្រាប់នៅឯទីកន្លែងតាំងពិព័រណ៍នៃស្រុកមឿង ខេត្តប៉ាតានី (Pattani) កាលពីពេលជិតភ្លឺឈានចូលព្រឹកថ្ងៃសុក្រ។
នគរបាល និងក្រុមអ្នកជំនាញខាងអាវុធ-ជាតិផ្ទុះបានចុះទៅកន្លែងកើតហេតុដែលស្ថិតនៅទល់មុខកន្លែងតាំងពិព័រណ៍វប្បធម៌ និងផលិតផលក្នុងស្រុកនៅលើដងវិថីសួនសម្ដេច។ នេះបើយោងតាមការបង្ហើបឱ្យដឹងពីឧត្ដមសេនីយ៍ចេហ្វ៊ី សៃមណៈគុល (Jeffey Saimanakul) អធិការនគរបាលស្រុកមឿង។ លោកបានទទួលការហៅទូរស័ព្ទសូមធ្វើអន្តរាគមន៍នៅម៉ោង៥:៣ ០ព្រឹក។
នគរបាលស្រាវជ្រាវឃើញថាគ្រាប់បែកទី១ផ្ទុះនៅម៉ោង៤:៤៤ព្រឹកនៅខាងក្នុងប៉ុស្តិ៍យាមនៃច្រកចេញចូលមន្ទីរទេសចរណ៍ និងកីឡាខេត្តប៉ាតានី បណ្ដាលឱ្យខូចខាតត្រឹមតែបន្តិចបន្តួចប៉ុណ្ណោះ។ កន្លងផុតទៅមិនយូរប៉ុន្មាន គ្រាប់បែកទី២ និងទី៣ក៏ផ្ទុះឡើងជាបន្តបន្ទាប់គ្នាចម្ងាយ៤រយម៉ែត្រពីគ្រាប់បែកទី១។ គ្រឿងផ្ទុះទាំងនេះត្រូវគេបង្កប់ទុកនៅក្នុងបង្គោលភ្លើងក្បែរស្តង់លក់ឥវ៉ាន់ដែលគេធ្វើនៅតាមមាត់ផ្លូវចម្ងាយ១រយម៉ែត្រពីច្រកចូលកន្លែងតាំងពិព័រណ៍។
ហេតុការណ៍នេះបណ្ដាលឱ្យដួលបង្គោលភ្លើង២។ គេឃើញស្នាមហូរឈាមសស្រាក់របស់ជនរងគ្រោះស្រោចពេញផ្លូវ។ គេបានបញ្ជូនអ្នកទាំង៧ទៅមន្ទីរពេទ្យខេត្តប៉ាតានី។ នៅពេលនេះ ពួកគេរួចផុតពីគ្រោះថ្នាក់ដល់អាយុជីវិតហើយ។ សាក្សីនិយាយថានៅពេលផ្ទុះគ្រាប់បែកទាំងនោះ អ្នកលក់ឥវ៉ាន់នៅតាមស្តង់នីមួយៗកំពុងគេងលង់លក់យ៉ាងស្កប់ស្កល់នៅក្នុងដំណេក។ អ្នកខ្លះសម្រាកលំហែកាយយកកម្លាំងនៅក្នុងតូប ប៉ុន្តែមិនបានគេងលក់ទេ។
លទ្ធផលស៊ើបអង្កេតបង្ហាញថាគ្រាប់បែកទី១ផ្ទុះនៅម៉ោង៤:៤៤, គ្រាប់បែកទី២ផ្ទុះនៅម៉ោង៥:១៩ និងគ្រាប់បែកទី៣ផ្ទុះនៅម៉ោង៥:៣០ទៀបភ្លឺ។ សមត្ថកិច្ចរកឃើញតាមកាមេរ៉ាសុវត្ថិភាពថាជនសង្ស័យយ៉ាងតិច៥ទៅ១០នាក់ជាប់ពាក់ព័ន្ធនឹងសកម្មភាពនេះ។ ពួកគេចែកជាពីរក្រុម។ ក្រុមទី១ផ្លោះរបងចូលទៅក្នុងបរិវេណនោះក្រោយពេលរំលងអធ្រាត្រ និងបង្កប់គ្រាប់បែកកែច្នៃនៅក្នុងប៉ុស្តិ៍យាម។ ចំណែកក្រុមទី២បង្កប់គ្រាប់បែក២គ្រាប់នៅក្នុងបង្គោលភ្លើង។ រួចហើយពួកគេក៏រត់គេចខ្លួនបាត់ស្រមោល៕
