តំបន់ផ្សារទួលទំពូង នឹងក្លាយជាទីតាំង«ចូលឆ្នាំ»មួយ នៃព្រឹត្តិការណ៍នគរសង្រ្កាន្ត
ភ្នំពេញ៖ តំបន់ផ្សារទួលទំពូង និងផ្លូវ១៥៥ ក៏ត្រូវបានជ្រើសរើស ជាទីតាំងសម្រាប់ការរៀប ចំព្រឹត្តិការណ៍«នគរសង្រ្កាន្ត»ដែរ ក្រៅពីតំបន់សំខាន់ៗផ្សេងទៀត ដូចជារមណីយដ្ឋានវត្តភ្នំ ផ្លូវថ្មើរជើងចតុមុខ បរិវេណសួនច្បារវឌ្ឍនៈ ដល់ផ្សាររាត្រី, បរិវេណសួនច្បារវត្តបទុមវតី និងផ្លូវបាសាក់។
ក្រុមការងាររៀបចំព្រឹត្តិការណ៍នគរសង្រ្កាន្ត បានប្រាប់សារព័ត៌មាន ThmeyThmey ថា ប្រជាពលរដ្ឋនិងហាងប្រកបអាជីវកម្មលើផ្លូវនោះ បានបង្ហាញការគាំទ្រ និងរីករាយ ចំពោះការជ្រើសរើស និងរៀបចំផ្លូវដ៏មមាញឹកមួយនេះ សម្រាប់ថ្ងៃចូលឆ្នាំ។
តាមផែនការ ផ្លូវលេខ១៥៥ នឹងក្លាយជាផ្លូវថ្មើរជើងចាប់ពីម៉ោង២រសៀល ដល់ម៉ោង១០ យប់ ដែលមានកម្មវិធីកម្សាន្តសប្បាយជាច្រើននៅលើផ្លូវនេះ។ ក្រុមការងាររៀបចំព្រឹត្តិ ការណ៍ នគរសង្ក្រាន្តបញ្ជាក់ដូច្នេះ ដោយបន្ថែមថា៖ «ចំណុចពិសេស យើងនឹងរៀបចំតំបន់នោះ ឱ្យក្លាយជាផ្លូវថ្មើរជើង ដែលពលរដ្ឋអាចដើរកម្សាន្តបាន ដោយរៀបចំភ្លើង និងផ្កា ឱ្យមានភាពរស់រវើក»។
សម្រាប់ទីតាំងជុំវិញផ្សារទួលទំពូង និងផ្លូវលេខ១៥៥នេះ ក៏មានការលេងល្បែងប្រជាប្រិយ, ល្បែងកម្សាន្តជាមួយហាងអាជីវកម្មនៅតំបន់នោះ ជាពិសេសការប្រគំតន្រ្តីខ្នាតតូចផងដែរ ។ តាមផែនការ ក្រុមការងាររៀបចំ នឹងចុះមកតុបតែងតំបន់នេះនៅដើមខែមេសា ដើម្បីឱ្យទីតាំងជុំវិញផ្សារទួលទំពូង និងលើផ្លូវលេខ១៥៥ កែង៤៧០ ដែលជាផ្នែកមួយនៃ ព្រឹត្តិការណ៍«នគរសង្ក្រាន្ត» ក្លាយជាតំបន់ចូលឆ្នាំដ៏អ៊ូអរ។
មុនការងារតុបតែងចាប់ផ្តើមឡើង លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ក៏បានចុះជួបសំណេះសំណាល ជាមួយអាជីវករលក់ដូរនៅជុំវិញផ្សារទួលទំពូងដែរកាលពីព្រលប់ថ្ងៃទី១៨ ខែមីនា។ តាមរយៈសំណេរលើទំព័រហ្វេសប៊ុកប្រធាន ស.ស.យ.ក. បានសម្តែងក្តីរីករាយ ដែលខ្លួននិងក្រុមការងារ ទទួលបានការស្វាគមន៍យ៉ាងកក់ក្តៅ និងមនោសញ្ចេតនា ពីបងប្អូនអាជីវករ និងប្រជាពលរដ្ឋ នៅផ្សារទួលទំពូង និងតាមដងវិថី១៥៥ និង៤៥០។
សហភាពសហព័ន្ធយុវជនកម្ពុជា (ស.ស.យ.ក.) នឹងរៀបចំព្រឹត្តិការណ៍ «នគរសង្រ្កាន្ត» រយៈពេល៦ថ្ងៃ ដោយរាប់ចាប់ពីថ្ងៃទី១៤-១៩ ខែមេសា ដើម្បីអបអរពិធីបុណ្យចូលឆ្នាំប្រពៃណីជាតិខ្មែរ។ បើតាមលោក ហ៊ុន ម៉ានី ព្រឹត្តិការណ៍នេះ មិនត្រឹមតែអបអរសាទរទំនៀមទម្លាប់ប្រពៃណីជាតិប៉ុណ្ណោះទេ តែជាការពង្រឹងអត្តសញ្ញាណជាតិ តាមរយៈពិធីសាសនា ម្ហូបអាហារ ល្បែងប្រជាប្រិយ និងកម្មវិធីវប្បធម៌នានា៕
