ឧបនាយករដ្ឋមន្ត្រី ហង់ជួន ណារ៉ុន៖ ការប្រឡងបាក់ឌុបឆ្នាំនេះ ល្អប្រសើរជាងឆ្នាំមុន ទោះបីសាលានៅព្រំដែនចំនួន២៥ មិនទាន់អាចឲ្យសិស្សត្រឡប់ទៅសិក្សាវិញបាន ដោយសារការឈ្លានពានរបស់ថៃក្ដី

(ភ្នំពេញ)៖ បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងឲ្យដឹងថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ក្នុងឆ្នាំនេះនៅតែមានភាពល្អប្រសើរជាងឆ្នាំមុន បើទោះបីជាមានសាលារៀននៅព្រំដែនចំនួន២៥ មិនទាន់អាចឲ្យសិស្សត្រឡប់ទៅសិក្សាវិញបានដោយសារការឈ្លានពានរបស់ថៃក្ដី។

ការលើកឡើងរបស់ឧបនាយរដ្ឋមន្ត្រី ហង់ជួន ណារ៉ុន ធ្វើឡើងក្នុងកិច្ចសម្ភាសន៍ជាមួយអ្នកសារព័ត៌មាន ក្នុងឱកាសអញ្ជើញបើកវិញ្ញាសាប្រឡងសញ្ញាបត្របាក់ឌុប ឆ្នាំ២០២៦ នៅថ្ងៃទី១០ ខែសីហា ឆ្នាំ២០២៦។

បណ្ឌិតសភាចារ្យ ហង់ជួន ណារ៉ុន បានថ្លែងឲ្យដឹងថា ចំពោះការប្រឡងនៅឆ្នាំនេះ គឺមានភាពល្អប្រសើរជាងឆ្នាំទៅមិញ មិនមានវិទ្យាល័យណាមួយប៉ះពាល់នោះឡើយ បើទោះបីជាមានវិទ្យាល័យរហូតដល់២៥ មិនទាន់អាចឲ្យសិស្សត្រឡប់ទៅសិក្សាវិញបានក្ដី ដោយសារតែមូលហេតុ គឺការឈ្លានពានរបស់យោធាថៃ។ ក្នុងនោះរាជរដ្ឋាភិបាលកំពុងទាមទារ ដើម្បីអាចធ្វើយ៉ាងណាឲ្យសិស្ស អាចត្រឡប់ទៅសាលារៀនឡើងវិញ។

បណ្ឌិតសភាចារ្យបានបញ្ជាក់ថា «ចំពោះឆ្នាំនេះការរៀបចំការប្រឡង គឺល្អប្រសើរជាងឆ្នាំមុន ដោយសារតែឆ្នាំមុនទាំងសាលា ទាំងគ្រូ ទាំងសិស្ស គឺប៉ះពាល់ដោយសារតែការឈ្លានពានរបស់ថៃ។ ខ្ញុំសូមឆ្លៀតយកឱកាសនេះ សម្ដែងនូវដឹងគុណចំពោះសម្តេចអគ្គមហាសេនាបតីតេជោ ហ៊ុន សែន ជាប្រធានព្រឹទ្ធសភានៃកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ដែលលោកបានខិតខំប្រឹងប្រែងតស៊ូ ប្រយុទ្ធប្រឆាំងនឹងការឈ្លានពានរបស់យោធាថៃ ដើម្បីការពារបូរណភាពទឹកដីរបស់កម្ពុជា និងជួយដល់សិស្ស និងប្រជាជនដែលទទួលរងផលប៉ះពាល់»។

សូមជម្រាបថាសូមជម្រាបថា ការប្រឡងបាក់ឌុប ឆ្នាំ២០២៦នេះ មានបេក្ខជនចុះឈ្មោះ ប្រឡងសរុប ១៥១ ២៣៨ នាក់ (ស្រី ៨៤ ៧៣៥ នាក់) ក្នុងនោះ៖ បេក្ខជនថ្នាក់វិទ្យាសាស្ត្រ មានចំនួន ៣៧ ៤៤៥ នាក់ (ស្រី ២២ ១៩៣ នាក់) បេក្ខជនថ្នាក់វិទ្យាសាស្ត្រសង្គម មានចំនួន ១១៣ ៧៩៣ នាក់ (ស្រី ៦២ ៥៤២ នាក់)។

បេក្ខជនត្រូវបានរៀបចំចំនួន ២៥នាក់ ក្នុងមួយបន្ទប់ តាមមណ្ឌលសំណេរនីមួយៗ លើកលែងតែបន្ទប់ចុងក្រោយ និងបន្ទប់ដែលមានបេក្ខជនមកពីវិទ្យាល័យអប់រំពិសេស។

មណ្ឌលសំណេរ មានចំនួនសរុប ២៤៤មណ្ឌល ស្មើនឹង ៦ ១០៤ បន្ទប់ ក្នុងនោះថ្នាក់វិទ្យាសាស្ត្រ មាន ៦៨ មណ្ឌល ស្មើនឹង ១ ៥២៦ បន្ទប់ និងថ្នាក់វិទ្យាសាស្ត្រសង្គម មាន ១៧៦ មណ្ឌល ស្មើនឹង ៤ ៥៧៨ បន្ទប់។ ចំណែកឯ មណ្ឌលកំណែ មានចំនួន១០មណ្ឌល ស្ថិតនៅរាជធានីភ្នំពេញ។

ឧបនាយករដ្ឋមន្ដ្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបញ្ជាក់ថា ដំណើរការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ នឹងប្រព្រឹត្តទៅដោយឈរលើគោលការណ៍ ច្បាប់ យុត្តិធម៌ តម្លាភាព និងលទ្ធផលទទួលយកបាន ពោលគឺ «អ្នកចេះ គឺជាប់»៕