ភ្លើងឆេះព្រៃ រាលដាលយ៉ាងខ្លាំងនៅអាមេរិក និង កាណាដា បង្ខំជម្លៀសមនុស្សជាង២ម៉ឺននាក់
ភ្លើងឆេះព្រៃដែលកំពុងឆេះពាសពេញភាគខាងលិចសហរដ្ឋអាមេរិក និងកាណាដាកាលពីថ្ងៃអាទិត្យ ធ្វើឱ្យប្រជាជនមួយចំនួនបង្កើនការយកចិត្តទុកដាក់ ចំពោះបទបញ្ជាជម្លៀស ខណៈអ្នកផ្សេងទៀតត្រូវបានបង្ខំឱ្យចាកចេញពីផ្ទះរួចហើយ ដោយរង់ចាំមើលថា តើមានអ្វីនៅសល់ ពេលពួកគេត្រឡប់មកវិញ។
យោងតាមទីភ្នាក់ងារសារព័ត៌មាន AP ផ្សាយនៅថ្ងៃទី១០ ខែសីហា ឆ្នាំ ២០២៦ នៅភាគខាងលិចប្រទេសកាណាដា មនុស្សជាង ២០ ០០០នាក់ ត្រូវបានបង្ខំឱ្យចាកចេញពីសហគមន៍តាមបណ្តោយបឹង Okanagan ក្នុងខេត្ត British Columbia ប្រទេសកាណាដា កាលពីចុងសប្តាហ៍ ខណៈភ្លើងឆេះព្រៃ កំពុងរាលដាលយ៉ាងលឿនបានបំផ្លាញផ្ទះសម្បែង និងរាប់សិបខ្នងត្រូវបានជួយសង្គ្រោះដោយយន្តហោះ។
នៅសហរដ្ឋអាមេរិក ក្រុមអ្នកជួយសង្គ្រោះនៅទីក្រុងវ៉ាស៊ីនតោន បានប្រយុទ្ធប្រឆាំងនឹងភ្លើងឆេះព្រៃចំនួនបីដែលបានចាប់ផ្តើមឆេះ នៅក្នុងតំបន់ Spokane អស់រយៈពេលជាងមួយសប្តាហ៍។
លោកស្រី Laurie Allen បានចាកចេញពីផ្ទះនៅតំបន់ Nine Mile Falls ជាសហគមន៍មួយ នៅភាគខាងជើងនៃ Spokane កាលពីចុងសប្តាហ៍មុន ដោយចាកចេញពីផ្ទះជាមួយស្វាមី ឆ្កែ និងកូនឆ្មាពីរក្បាលរបស់គាត់ ខណៈភ្លើងឆេះព្រៃកំពុងបន្ត។
លោកស្រីបន្តថា៖ « ខ្ញុំនៅទីនេះ ៦៥ឆ្នាំ ហើយ។ វា[ភ្លើងឆេះព្រៃ] មិនដែលកើតឡើងទេ។ យើងមិនបានគិតអ្វីក្រៅពីចាប់សត្វរបស់យើង ហើយចាកចេញនោះទេ។ ប៉ុន្តែឥឡូវនេះវាបានប៉ះពាល់ដល់មិត្តភក្តិ និងក្រុមគ្រួសាររបស់យើងជាច្រើន។ ដូច្នេះ ពិតជាគួរឱ្យរន្ធត់ណាស់»។
ក្រៅពីការជម្លៀសចេញនៅតំបន់ Summerland ភ្លើងឆេះព្រៃ Bald Range ជាលើកដំបូង នៅល្ងាចថ្ងៃសុក្រ ក៏បាននាំឱ្យមានការជម្លៀសមនុស្សប្រហែល ៨ ០០០ នាក់ នៅជុំវិញតំបន់ Peachland ក្បែរនោះផងដែរ។ ខេត្ត British Columbia ប្រទេសកាណាដា បានប្រកាសអាសន្ន កាលពីថ្ងៃសៅរ៍៕