ជនសង្ស័យ ១ ក្រុម ប្លន់ម៉ូតូ ១ គ្រឿង ពីយុវជនម្នាក់ដឹកអីវ៉ាន់អនឡាញបានសម្រេច នៅខណ្ឌសែនសុខ
ជនសង្ស័យ ១ ក្រុម មានគ្នា ៣ នាក់ បានធ្វើសកម្មភាពយកដែកឆាបចាក់ទៅលើយុវជនម្នាក់ជាអ្នកដឹកទំនិញអនឡាញ រួចប្លន់យកម៉ូតូម៉ាក និច បានសម្រេច។
ហេតុការណ៍នេះបានកើតឡើងកាលពីវេលាម៉ោង ២ និង ៣០ នាទី រំលងអធ្រាត្រ ឈានចូលថ្ងៃទី ៣០ ខែមេសា ឆ្នាំ ២០២៥ នៅផ្លូវ ២០០២ សង្កាត់អូបែកក្អម ខណ្ឌសែនសុខ រាជធានីភ្នំពេញ។
ជនរងគ្រោះឈ្មោះ សឿង រដ្ឋា ភេទប្រុស អាយុ ២០ ឆ្នាំ មុខរបរដឹកអីវ៉ាន់អនឡាញ ស្នាក់នៅសង្កាត់ចាក់អង្រែលើ ខណ្ឌមានជ័យ មានស្រុកកំណើតនៅស្រុកត្រាំកក់ ខេត្តតាកែវ។
តាមសម្ដីជនរងគ្រោះបាននិយាយថា នៅមុនពេលកើតហេតុគាត់បានជិះម៉ូតូម៉ាកនិច ពណ៌ក្រហម ស៊េរី ២០២៤ ពាក់ស្លាកលេខ ភ្នំពេញ 1KU-5812 ដឹកម្ហូបឲ្យភ្ញៀវនៅផ្លូវ ២០០២ ហើយក៏ឈប់ចតរង់ចាំភ្ញៀវ ដោយចុះពីលើម៉ូតូ តែមិនបានដកសោម៉ូតូ។ លុះបន្ទាប់មក ក៏ស្រាប់តែឃើញជនសង្ស័យមានគ្នា ៣ នាក់ ជិះម៉ូតូ ១ គ្រឿង ម៉ាកឌ្រីមសង់ ស៊េរី ២០២២ ពណ៌ខ្មៅ មិនចាំស្លាកលេខ បានធ្វើសកម្មភាពយកដែកឆាបមុខស្រួចមកដេញចាក់ធ្វើឲ្យជនរងគ្រោះភ័យរត់ចោលម៉ូតូ ចំណែកជនសង្ស័យនាំគ្នាយកម៉ូតូជិះគេចបាត់តែម្ដង។
ក្រោយពេលកើតហេតុ សមត្ថកិច្ចនគរបាលប៉ុស្តិ៍ បានមកដល់ ហើយនាំជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលសង្កាត់អូបែកក្អម ដើម្បីឲ្យសមត្ថកិច្ចស្រាវជ្រាវតាមចាប់ជនសង្ស័យមកផ្ដន្ទាទោសតាមច្បាប់៕
