ស្ពានថ្មើរជើង ច្រកចូលខាងកើត ប្រាសាទអង្គរវត្ដ កំពុងទាក់ទាញទេសចរទៅទស្សនា
សៀមរាប៖ នៅពេលភ្ញៀវទេសចរជាច្រើននាំគ្នាចូលទស្សនាប្រាសាទអង្គរវត្តតាមច្រកខាងលិច មានច្រកស្ងប់ស្ងាត់ និងស្រស់ស្រាយ ដែលទេសចរគួរសាកធ្វើដំណើរ នោះគឺការធ្វើដំណើរលើស្ពានថ្មើរជើងខាងកើត។ សម្រស់យ៉ាងស្រស់ស្អាត អមដោយធម្មជាតិអមជុំវិញដ៏ខៀវស្រងាត់ នៅស្ពានថ្មើរជើងខាងកើតនេះ គឺជាចំណីចក្ខុថ្មីមួយទៀត របស់ភ្ញៀវទេសចរ។ មិនតែប៉ុណ្ណោះ ដើរកាត់ស្ពានថ្មើរជើងតាមច្រកខាងកើតនេះ ទេសចរក៏អាចគយគន់ទេសភាពកសិណទឹក និងផ្ដិតយករូបភាពពីផ្នែកខាងក្រោយនៃប្រាសាទអង្គរវត្ដបានដែរ។ ម្ដងម្កាលក៏ឃើញមានទេសចរជាតិមួយចំនួន មកដើរហាត់ប្រាណពេលល្ងាចៗដែរ៕
