លោក វ៉ាង វិនពីន៖ ការនាំ«ទុរេនខ្មែរ»ចូលទីផ្សារចិន កើតចេញពីកិច្ចសហប្រតិបត្តិការទ្វេភាគីល្អ
ភ្នំពេញ៖ លោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា ចាត់ទុកការនាំចេញ «ទុរេនស្រស់» ពីកម្ពុជាទៅកាន់ទីផ្សារចិន គឺជាសមិទ្ធផលថ្មីមួយទៀតនៃកិច្ចសហប្រតិបត្តិការល្អរវាងកម្ពុជា និងចិន។ នេះជាការកសិផលមានគុណភាពខ្ពស់ដំបូងរបស់កម្ពុជាដែលត្រូវបានអនុញ្ញាតនាំចេញទៅចិន ក្នុងឆ្នាំ២០២៥។
«ទុរេនស្រស់របស់កម្ពុជា បានបញ្ចប់នីតិវិធីសម្រាប់ការនាំចេញទៅប្រទេសចិន ហើយអាចនាំចេញទៅប្រទេសចិនបាន។ នេះជាកសិផលដែលមានគុណភាពខ្ពស់ដំបូងគេរបស់កម្ពុជាដែលត្រូវបានអនុញ្ញាតនាំចេញទៅកាន់ប្រទេសចិន ក្នុងឆ្នាំ២០២៥ និងជាសមិទ្ធផលថ្មីមួយទៀត នៃកិច្ចសហប្រតិបត្តិការជាក់ស្តែងចិន-កម្ពុជាផងដែរ។»។ លោក វ៉ាង វិនពីន បានសរសេរបែបនេះ នៅលើទំព័រហ្វេសប៊ុកផ្ទាល់ខ្លួន កាលពីថ្ងៃទី ៨ ខែកក្កដា។
កន្លងទៅ ឯកអគ្គរដ្ឋទូតចិនរូបនេះ ក៏ធ្លាប់លើកសសើរថា ទុរេនខ្មែរ ប្រភេទ «ឪខាក់» ឆ្ងាញ់ជាងគេលើពិភពលោក និងចង់ឱ្យវត្តមានទុរេនខ្មែរកាន់តែច្រើន នៅលើទីផ្សារប្រទេសចិន ។
យោងតាមការប្រកាសព័ត៌មា នរបស់ក្រសួងកសិកម្ម នៅថ្ងៃទី ៥ ខែកក្កដា កម្ពុជាទទួលការអនុញ្ញាតពីអគ្គរដ្ឋបាលគយចិន (GACC) នាំចេញផ្លែទុរេនស្រស់ ដោយផ្ទាល់ទៅកាន់ទីផ្សារ ចិនហើយ។ ការសម្រេចរបស់ GACC បានធ្វើឡើងបន្ទាប់ពីបានវាយតម្លៃលើសំណើរបស់ចម្ការទុរេន ១១២កន្លែង និងរោងចក្រវេចខ្ចប់ ៣០កន្លែងនៅកម្ពុជា ដែលបានបំពេញលក្ខខណ្ឌជាចម្បង ដូចជាអនុវត្តតាមគោលការណ៍កសិកម្មល្អ (GAP) ភូតគាមអនាម័យ និងស្តង់ដាសុវត្ថិភាពចំណីអាហាររបស់ចិន។
ទុរេន ជាផ្លែឈើទី៥ និងជាកសិផលទី៩ របស់កម្ពុជា ដែលអាចនាំចេញទៅចិន បន្ទាប់ពី ចេក ស្វាយ ដូង មៀន អង្ករ កញ្ចុងអង្ករ ចំណិតដំឡូងមីក្រៀម គ្រាប់ពោត និងម្រេច៕