ហេតុអ្វីបានតម្លៃមាសអន្តរជាតិប្រែប្រួលរហ័សម្ល៉េះក្នុងមួយរយៈពេលចុងក្រោយ?
តម្លៃមាសអន្តរជាតិសម្រាប់ការជួញដូរភ្លាមៗ (Spot Gold) បានកើនដល់ជាង ៤ ៦៤០ ដុល្លារ/អោន កាលពីថ្ងៃអង្គារសប្ដាហ៍មុន ដល់កម្រិតខ្ពស់បំផុតក្នុងរយៈពេលជាង ៣ ខែ។
ប៉ុន្តែគិតមកត្រឹមថ្ងៃអង្គារសប្ដាហ៍នេះ តម្លៃមាសដដែលបានធ្លាក់ចុះជាបន្តបន្ទាប់ មកត្រឹមតែប្រហែល ៤ ៣៤០ ដុល្លារ/អោន ពោលគឺខុសគ្នាជាង ៣០០ ដុល្លារ ក្នុងរយៈពេលត្រឹម ១ សប្ដាហ៍។ វាបានបន្តធ្លាក់ទៀតនៅថ្ងៃព្រឹកថ្ងៃពុធ ទី២ កញ្ញា មកត្រឹម ៤ ៣០២ ដុល្លារ/អោន។
តើមូលហេតុអ្វីបានជានិន្នាការតម្លៃមាសអន្តរជាតិឥឡូវនេះ មានការប្រែប្រួលរហ័សម្ល៉េះ?
ការឡើងថ្លៃខ្លាំងរបស់មាសកាលពីសប្ដាហ៍មុន ត្រូវបានជំរុញមួយផ្នែកដោយការរំពឹងថា ធនាគារកណ្តាលសហព័ន្ធអាមេរិក (Fed) អាចមិនដំឡើងអត្រាការប្រាក់ក្នុងពេលឆាប់ៗនោះទេ។ ការចុះខ្សោយនៃប្រាក់ដុល្លារ និងក្ដីរំពឹងពីការមិនរឹតបន្តឹងគោលនយោបាយរូបិយវត្ថុរបស់ Fed ធ្វើឱ្យវិនិយោគិនងាកទៅទិញមាសកាន់តែច្រើន នោះហើយជាមូលហេតុធំមួយធ្វើឱ្យតម្លៃមាសអន្តរជាតិកើនឡើង។
ប៉ុន្តែនិន្នាការនេះបានផ្លាស់ប្តូរយ៉ាងលឿន។ ភាពតានតឹងរវាងសហរដ្ឋអាមេរិក និងអ៊ីរ៉ង់ បានធ្វើឱ្យតម្លៃប្រេងកើនឡើង និងបង្កើនការព្រួយបារម្ភថា អតិផរណាអាចនៅខ្ពស់។ ប្រសិនបើអតិផរណានៅតែខ្ពស់ ទីផ្សារអាចរំពឹងថា Fed នឹងរក្សាអត្រាការប្រាក់ខ្ពស់ ឬអាចដំឡើងបន្ថែម ដែលការរំពឹងបែបនេះជាទូទៅមិនអំណោយផលដល់មាសនោះទេ។
ការរំពឹងថា Fed អាចដំឡើងអត្រាការប្រាក់ បានធ្វើឱ្យការប្រាក់ពីមូលបត្របំណុលរដ្ឋាភិបាលអាមេរិកកើនឡើង និងធ្វើឱ្យប្រាក់ដុល្លាររឹងមាំឡើង។ កត្តាទាំង២ នេះបានបង្កើនការលក់មាសចេញ ព្រោះមាសមិនផ្តល់ការប្រាក់ ខណៈអ្នកវិនិយោគអាចងាកទៅកាន់ទ្រព្យសកម្មដែលផ្តល់ការប្រាក់ ដែលធ្វើឱ្យមាសធ្លាក់ថ្លៃ។
ការប្រែប្រួលខ្លាំងរបស់មាសក្នុងពេលនេះ គឺជាលទ្ធផលនៃការផ្លាស់ប្តូរយ៉ាងលឿនក្នុងការរំពឹងរបស់ទីផ្សារ ជាពិសេសចំពោះអត្រាការប្រាក់របស់ Fed ប្រាក់ដុល្លារ និងតម្លៃប្រេងអន្តរជាតិ ដែលឡើងចុះដោយអាស្រ័យលើការវិវត្តនៃស្ថានការណ៍ជម្លោះអាមេរិក-អ៊ីរ៉ង់។ ទោះបីភាពតានតឹងភូមិសាស្ត្រនយោបាយជាទូទៅគាំទ្រមាសក្នុងនាមជាទ្រព្យសកម្មសុវត្ថិភាពក៏ដោយ ជម្លោះមជ្ឈិមបូព៌ាដែលប៉ះពាល់ដល់គោលនយោបាយ Fed នៅជះឥទ្ធិពលខ្លាំងជាងក្នុងរយៈពេលខ្លី៕