អាជ្ញាធរខណ្ឌ៧មករា ប្រើរថយន្តបាញ់ទឹកនៅតាមសាលារៀន ដើម្បីកាត់បន្ថយរលកកម្តៅ ជូនសិស្សានុសិស្ស
រាជធានីភ្នំពេញ៖ ខណៈបច្ចុប្បន្ន កត្តាអាកាសធាតុហាក់មានការឡើងកម្តៅខ្លាំងគួរឱ្យកត់សម្គាល់ផងនោះ អាជ្ញាធរខណ្ឌ៧មករា ដឹកនាំដោយលោកថេង សុថុល អភិបាលខណ្ឌ បានយកចិត្តទុកដាក់ក្នុងការប្រើប្រាស់រថយន្តបាញ់ទឹក ដោយបាញ់នៅក្នុងបរិវេណបណ្តាសាលាបឋមសិក្សា ក្នុងមូលដ្ឋានរបស់ខ្លួន ដើម្បីជាការចូលរួមចំណែកកាត់បន្ថយរលកកម្តៅ ដែលជាផ្នែកមួយប៉ះពាល់ដល់សុខភាព និងការរៀនសូត្ររបស់ក្មួយៗជាសិស្សាតូចៗ នៅតាមសាលារៀន ។
លោក កេត ឧត្តម អភិបាលរងខណ្ឌ៧មករា តំណាងលោកថេង សុថុល អភិបាលខណ្ឌបានឱ្យដឹងថា ដោយសារតែកត្តាអាកាសធាតុ នៅរាជធានីភ្នំពេញក្នុងមួយរយះពេលក្រោយមកនេះ មានការឡើងកម្តៅរហូតដល់៤០អង្សារ ដែលជាកត្តាព្រួយបារម្ភមួយ ទើបរដ្ឋបាលខណ្ឌ បានរៀបចំរថយន្តក្នុងការចុះបាញ់ទឹកដល់សាលាបឋមសិក្សាចំនួន០២ គឺសាលាបឋមសិក្សាបាក់ទូក និងសាលាបឋមសិក្សាវត្តព្រះពុទ្ធមានបុណ្យ ។
លោកអភិបាលរង បន្ថែមថា ការចុះបាញ់ទឹកនេះ គឺធ្វើឡើងរៀងរាល់២ថ្ងៃម្តង ឬអាចក៏បត់បែនតាមភាពជាក់ស្តែង នៃអាកាសធាតុ បើធាតុអាកាសនៅតែក្តៅខ្លាំង អាជ្ញាធរអាចចុះបាញ់ទឹកជាប្រចាំផងដែរ រហូតអាកាសធាតុវិលទៅរកភាពប្រក្រតីឡើងវិញ ។
លោក សុខ គឹមសួគ៌ នាយកសាលាបឋមសិក្សារបាក់ទូក មានក្តីសប្បាយរីករាយ ចំពោះការគិតគូររបស់រដ្ឋបាលខណ្ឌមកតាមសាលាបឋមសិក្សា ដែលមានសិស្សតូចៗជាច្រើនកំពុងរៀនសូត្រ ។ ក្នុងស្ថានភាពអាកាសឡើងកម្តៅនេះដែរ ក្នុងនាមនាយកគ្រប់គ្រងសាលា លោកក៏បានណែនាំដល់សិស្សញុំាទឹកឱ្យបានច្រើនគ្រប់គ្រាន់ និងជ្រកក្រោមម្លប់ ឬកន្លែងដែលមានភាពត្រជាក់ មានខ្យល់អាកាសចេញចូលផងដែរ បង្ការការរងឥទ្ធិពលកម្តៅព្រះអាទិត្រ អាចបណ្តាលឱ្យប៉ះពាល់ដល់សុខភាពផងដែរ។
គួរបញ្ជាក់ថា កត្តាអាកាសធាតុក្នុងពេល១ខែក្រោយមកនេះ មានសីតុណ្ហភាពកើនឡើងខ្លាំង ដែលបានបង្កជាក្តីព្រួយបារម្ភខ្ពស់មួយសម្រាប់ប្រជាពលរដ្ឋ នៅតាមតំបន់ ឬភូមិសាស្ត្រនីមួយៗដែលបានទទួលរងឥទ្ធិពលកម្តៅនេះ ពិសេសពលរដ្ឋនៅរាជធានីភ្នំពេញតែម្តង ព្រោះនៅពេលសីតុណ្ហភាពក្តៅបែបនេះ វាប្រាកដជាអាចប៉ះពាល់ខ្លាំងទៅដល់សុខុមាលភាពរបស់មនុស្ស៕
