មួយខែក្រោយបទឈប់បាញ់ចូលជាធរមាន កម្ពុជា បានអនុវត្តយ៉ាងម៉ឹងម៉ាត់គ្រប់ចំណុច ដែលបានព្រមព្រៀង
គិតចាប់ពីថ្ងៃទិ២៨ កក្កដា ដល់ថ្ងៃទី២៨ សីហានេះ គឺមានរយៈពេល១ខែគត់ ដែលកិច្ចព្រម ព្រៀងឈប់បាញ់ បានចូលជាធរមាន។ ក្នុងរយៈពលេ១ខែមកនេះ កម្ពុជា អនុវត្តកិច្ចព្រម ព្រៀងបានយ៉ាងល្អ ដោយអនុវត្តយ៉ាងម៉ឹងម៉ាត់ នូវគ្រប់ចំណុចទាំងអស់ដែល បាន ព្រម ព្រៀងគ្នា។ លោក ប៉ែន បូណា អ្នកនាំពាក្យរាជរដ្ឋាភិបាល បានអះអាងដូច្នេះ នៅក្នុង សន្និសីទសារព័ត៌មាននៅរសៀលថ្ងៃទី២៨សីហានេះ។
សម្រាប់អ្នកនាំពាក្យរាជរដ្ឋាភិបាល ការអនុវត្តយ៉ាងខ្ជាប់ខ្ជួនរបស់កម្ពុជា ចំពោះកិច្ចព្រមព្រៀងឈប់បាញ់ គឺឆ្លុះបញ្ចាំងពីការផ្តល់តម្លៃដល់អាយុជីវិតមនុស្ស និងពីបេះដូងស្រឡាញ់សន្តិភាពរបស់ថ្នាក់ដឹកនាំកម្ពុជា និងប្រជាពលរដ្ឋកម្ពុជា។
លោក ប៉ែន បូណា បន្ថែមថា៖« នេះសបញ្ជាក់ឱ្យឃើញថា មិនត្រឹមតែពាក្យសម្តីប៉ុណ្ណោះទេ ប៉ុន្តែកម្ពុជាបានបង្ហាញឱ្យឃើញជាក់ស្តែង ពីភាពបរិសុទ្ធ និងស្មោះត្រង់ចំពោះបុព្វហេតុសន្តិភាព និងភាពសុខសាន្ត របស់ប្រជាពលរដ្ឋយ៉ាងពិតប្រាកដ ហើយដែលត្រូវបានទទួលស្គាល់យ៉ាងទូលំទូលាយ ទាំងក្នុងក្របខណ្ឌអាស៊ាន និងអន្តរជាតិ។»។
បេះដូងស្រឡាញ់សន្តិភាព និងផ្តល់តម្លៃខ្ពស់ចំពោះជីវិតពលរដ្ឋ ក៏ត្រូវបានលោក ដូណាល់ ត្រាំ ប្រធានាធិបតីអាម៉េរិក កត់សម្គាល់ដែរ គឺតាមរយៈលិខិតដែលលោកត្រាំ បាន អាម៉េរិក ផ្ញើជូនសម្តេច ហ៊ុន ម៉ាណែត នាយករដ្ឋមន្ត្រីកម្ពុជា កាលពីថ្ងៃទី២៥សីហាកន្លងទៅ និងត្រូវបានផ្សាយជាសាធារណៈ កាលពីយប់ថ្ងៃទី២៧សីហា។
នៅក្នុងលិខិតនោះ លោក ត្រាំ បានសរសើរសម្តេចនាយករដ្ឋមន្ត្រីកម្ពុជាថា «សម្តេច ហ៊ុន ម៉ាណែត គឺជាថ្នាក់ដឹកនាំឆ្នើមមួយរូប ដែលផ្តល់តម្លៃដល់ជីវិតមនុស្ស និងស្រឡាញ់សន្តិភាព»។
ប្រធានាធិបតីអាម៉េរិក ក៏បានបន្ថែមថា កម្ពុជាមានប្រវត្តិសាស្ត្រ និងវប្បធម៌ដ៏យូរអង្វែង និងសម្បូរបែប និងថា អាម៉េរិក និងកម្ពុជាអាចផ្តោតការយកចិត្តទុកដាក់លើការកសាងវិបុលភាព សម្រាប់ប្រជាជាតិដ៏អស្ចារ្យរវាងប្រទេសទាំងពីរ។ ភ្ជាប់ជាមួយសំណេរនេះ លោកប្រធានាធិបតីអាម៉េរិក ក៏បានអរគុណនាយករដ្ឋមន្ត្រីកម្ពុជា ដែលបានស្នើសុំឱ្យរូបលោក ជាម្ចាស់ពានណូបែលសន្តិភាពពិភពលោកផងដែរ៕