អ៊ីស្រាអែលទាមទារសំណងពីអាមេរិក ក្រោយកិច្ចព្រមព្រៀងលក់យន្តហោះ F-35 ឱ្យអារ៉ាប៊ីសាអូឌីត
បន្ទាប់ពីទីក្រុងវ៉ាស៊ីនតោនបានអនុម័តការលក់យន្តហោះចម្បាំង F-35 ដែលអាចកើតមាន ទៅឱ្យប្រទេសអារ៉ាប៊ីសាអូឌីត កាលពីម្សិលមិញ អ៊ីស្រាអែលមានគម្រោងស្នើសុំអាវុធ និងសមត្ថភាពការពារជាតិបន្ថែមទៀតពីសហរដ្ឋអាមេរិក ដើម្បីជាសំណង។ នេះបើយោងតាមប្រព័ន្ធផ្សព្វផ្សាយអ៊ីស្រាអែល។
គេហទំព័រព័ត៌មានអ៊ីស្រាអែល Walla បានរាយការណ៍នៅថ្ងៃសុក្រថា មន្ត្រីអ៊ីស្រាអែលនឹងស្នើសុំឱ្យរដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ អនុម័តប្រព័ន្ធអាវុធដែលទីក្រុងវ៉ាស៊ីនតោនធ្លាប់បានបដិសេធផ្តល់ឱ្យអ៊ីស្រាអែល។
សំណើដែលបានរាយការណ៍នេះលាតសន្ធឹងលើសពីយន្តហោះចម្បាំងទំនើប និងសមត្ថភាពលាក់បាំង រហូតដល់អាវុធមានមូលដ្ឋានលើលំហ ការអភិវឌ្ឍ និងផលិតយន្តហោះស្ទាក់ចាប់។ នេះបើយោងតាមការរាយការណ៍របស់ Walla ។
មន្ត្រីអ៊ីស្រាអែលក៏មានគម្រោងស្នើសុំគ្រាប់រំសេវបំបែកលេណដ្ឋាន និងប្រព័ន្ធអាវុធក្រោមដីដែលមានសមត្ថភាពប្រតិបត្តិការជ្រៅនៅក្រោមភ្នំថ្ម។
សារព័ត៌មាន Walla បន្តថា សំណើទាំងនេះមានបំណងធានាកញ្ចប់ សំណងរបស់សហរដ្ឋអាមេរិក បន្ទាប់ពីការសម្រេចចិត្តរបស់ទីក្រុងវ៉ាស៊ីនតោនអនុម័តការលក់ F-35 ដែលអាចកើតមានទៅឱ្យទីក្រុងរីយ៉ាដ។
របាយការណ៍នេះបានចេញផ្សាយ បន្ទាប់ពីក្រសួងការបរទេសអាមេរិកបានអនុម័តលើការលក់យន្តហោះចម្បាំង F-35 Lightning II ចំនួន ៤៨គ្រឿង ក្នុងតម្លៃប្រហែល ២៤.៣ប៊ីលានដុល្លារ ទៅឱ្យអារ៉ាប៊ីសាអូឌីត។
យោងតាមសេចក្តីជូនដំណឹងរបស់ក្រសួងការបរទេសអារ៉ាប៊ីសាអូឌីតទៅកាន់សភាអាមេរិក កញ្ចប់នៃការលក់ដែលស្នើឡើងនេះក៏រួមបញ្ចូល នូវម៉ាស៊ីនយន្តហោះ Pratt & Whitney F135-PW-100 ចំនួន ៤៩ គ្រឿង ឧបករណ៍ទំនាក់ទំនង និងឧបករណ៍អ៊ិនគ្រីប (cryptographic) ការគាំទ្រផ្នែកសង្គ្រាមអេឡិចត្រូនិក ការបណ្តុះបណ្តាល និងការផ្គត់ផ្គង់ផ្នែកភស្តុភារ។
យោងតាមទីភ្នាក់ងារសារព័ត៌មាន Reuters ការលក់យន្តហោះចម្បាំង F-35 ទៅឱ្យអារ៉ាប៊ីសាអូឌីត នឹងធ្វើឱ្យអាមេរិកត្រូវសម្រេចចិត្តថា តើត្រូវធ្វើដូចម្តេច ដើម្បីរក្សាឧត្តមភាពផ្នែកយោធារបស់អ៊ីស្រាអែល ស្របពេលខ្លួនក៏ត្រូវផ្គត់ផ្គង់អាវុធទំនើបៗដល់ប្រទេសមួយទៀតនៅក្នុងតំបន់ផងដែរ៕