រដ្ឋមន្ត្រីការពារជាតិកម្ពុជា ឡាវ វៀតណាម នឹងជួបប្រជុំត្រីភាគី នៅវៀងចន្ទន៍

ក្នុងសប្ដាហ៍នេះ កម្ពុជា ឡាវ វៀតណាម ដែលជាប្រទេសជិតខាងគ្នានឹងជួបប្រជុំត្រីភាគីថ្នាក់រដ្ឋមន្ត្រីការពារជាតិ នៅរដ្ឋធានីវៀងចន្ទន៍ ប្រទេសឡាវ ក្នុងក្របខ័ណ្ឌនៃការជួបប្រាស្រ័យទាក់ទងជាមិត្តភាព និងកិច្ចសហប្រតិបត្តិការការពារជាតិជាមួយគ្នាទៅវិញទៅមកនៃប្រទេសទាំងបី។

បើតាមសេចក្តីប្រកាសព័ត៌មានរបស់ក្រសួងការពារជាតិកម្ពុជា លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នឹងដឹកនាំគណៈប្រតិភូជាន់ខ្ពស់ក្រសួងការពារជាតិ និងអគ្គបញ្ជាការដ្ឋាននៃកងយោធពលខេមរភូមិន្ទ ទៅចូលរួមកិច្ចប្រជុំរដ្ឋមន្ត្រីការពារជាតិបីប្រទេស កម្ពុជា-ឡាវ-វៀតណាម ចាប់ពីថ្ងៃទី១៣ ដល់ថ្ងៃទី១៦ ខែតុលា ឆ្នាំ២០២៥ នៅប្រទេសឡាវ រដ្ឋធានីវៀងចន្ទន៍។

ដំណើរចូលរួមរបស់រដ្ឋមន្ត្រីក្រសួងការពារជាតិកម្ពុជាក្នុងកិច្ចប្រជុំត្រីភាគីនេះ គឺតបតាមការអញ្ជើញរបស់ឧត្តមសេនីយ៍ឯក ខាំលៀង ឧថាក់កែសន រដ្ឋមន្ត្រីការពារប្រទេសឡាវ ក្នុងនាមជាម្ចាស់ផ្ទះ។ ក្រៅពីកិច្ចប្រជុំត្រីភាគីនេះ ប្រមុខការពារជាតិកម្ពុជា ឡាវ វៀតណាម ក៏នឹងចូលរួមពិធីបិទលំហាត់ហ្វឹកហ្វឺនសង្គ្រោះគ្រោះមហន្តរាយរួមគ្នារវាងកងទ័ពទាំងបីប្រទេសនេះផងដែរ។

ក្រសួងការពារជាតិកម្ពុជា បានគូសបញ្ជាក់ថា ការអញ្ជើញចូលរួមកិច្ចប្រជុំរបស់ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នឹងបញ្ជាក់ជាថ្មីម្តងទៀតនូវចំណងមិត្តភាពសាមគ្គីភាពដ៏យូរអង្វែង និងការប្តេជ្ញាចិត្តរបស់ក្រសួងការពារជាតិកម្ពុជា នៃកងយោធពលខេមរភូមិន្ទរវាងកងទ័ពឡាវ និងកងទ័ពវៀតណាម សំដៅបង្កើនទំនាក់ទំនង និងជំរុញកិច្ចសហប្រតិបត្តិការការពារជាតិជាមួយគ្នាទៅវិញទៅមកឱ្យកាន់តែស៊ីជម្រៅរឹងមាំបន្ថែមទៀត។ ស្របគ្នានេះដែរ ក៏ចូលរួមការពារ ថែរក្សានូវសន្តិសុខ សន្តិភាព ស្ថេរភាព ការអភិវឌ្ឍ ប្រកបដោយចីរភាព និងសាមគ្គីភាព មិត្តភាព សម្រាប់តំបន់ និងលើសកលលោកទាំងមូល៕