ព័ត៌មានជាតិ រដ្ឋបាលរាជធានី ប្រកាសចូលកាន់មុខតំណែងអភិបាលខណ្ឌ ២ រូប និង អភិបាលរងខណ្ឌជាច្រើនរូប
អភិបាល អភិបាលរង នៃគណៈអភិបាលខណ្ឌនៅក្នុងរចនាសម្ព័ន្ធរដ្ឋបាលខណ្ឌនានា នៃរាជធានីភ្នំពេញ ត្រូវបានប្រកាសចូលកាន់មុខតំណែង ដើម្បីបន្តការងារបម្រើប្រជាពលរដ្ឋឱ្យកាន់តែល្អប្រសើរថែមទៀត ទាំងការរក្សាសន្តិសុខ សណ្ដាប់ធ្នាប់ អនាម័យ បរិស្ថាន និងការផ្តល់សេវាកាន់តែកៀកកិតជូនពលរដ្ឋជាដើម។
ពិធីប្រកាសចូលកាន់មុខតំណែង អភិបាល អភិបាលរង នៃគណៈអភិបាលខណ្ឌ ខាងលើនេះ បានធ្វើឡើងកាលពីព្រឹកថ្ងៃទី ១៤ ខែវិច្ឆិកា ឆ្នាំ ២០២៥ នៅសាលារាជធានីភ្នំពេញ ក្រោមអធិបតីភាពលោក ឃួង ស្រេង អភិបាល នៃគណៈអភិបាលរាជធានីភ្នំពេញ និង លោក ម៉ប់ សារិន ប្រធានក្រុមប្រឹក្សារាជធានីភ្នំពេញ។
កម្មវិធីនេះ លោក ម៉ូវ ម៉ានិត អភិបាលខណ្ឌសែនសុខ ត្រូវបានប្រកាសឱ្យកាន់តំណែងជាអភិបាលខណ្ឌច្បារអំពៅ។ លោក ចេង មុន្នីរ៉ា អភិបាលខណ្ឌច្បារអំពៅ មកជាអភិបាលខណ្ឌសែនសុខវិញ។ លោក ជា ពិសី ត្រូវបានប្រកាសឱ្យកាន់តំណែងជាអភិបាលខណ្ឌទួលគោក សម្រាប់អាណត្តិទី ២។ ការកាន់តំណែងជាអភិបាលរងខណ្ឌសម្រាប់អាណត្តិទី ២ ពីររូប គឺ លោក សយ ឬទ្ធី ជាអភិបាលរងខណ្ឌចំការមន និងលោក ពាម វាសនា ជាអភិបាលរងខណ្ឌ ៧ មករា។
លោក ជ ចាន់ស៊ាង ពីអភិបាលរងខណ្ឌដង្កោ ទៅជាអភិបាលរងខណ្ឌច្បារអំពៅ។ លោក ចាន់ បណ្ឌិត ពីអភិបាលរងខណ្ឌទួលគោក ទៅជាអភិបាលរងខណ្ឌដូនពេញ។ លោកស្រី ព្រុំ រដ្ឋា ពីអភិបាលរងខណ្ឌទួលគោក ទៅជាអភិបាលរងខណ្ឌឫស្សីកែវ។
លោក កៅ សារ៉ាវុធ ពីអភិបាលរងខណ្ឌជ្រោយចង្វារ ទៅជាអភិបាលរងខណ្ឌដូនពេញ។ លោក ចាន់ គន្ថេត ពីអភិបាលរងខណ្ឌដូនពេញ ទៅជាអភិបាលរងខណ្ឌទួលគោក។ លោកស្រី សួស សូលីដា ពីអភិបាលរងខណ្ឌឫស្សីកែវ ទៅជាអភិបាលរងខណ្ឌសែនសុខ។
លោក ហ៊ត គឹមនី ពីអភិបាលរងខណ្ឌច្បារអំពៅ ទៅជាអភិបាលរងខណ្ឌដង្កោ។ លោកស្រី សុង សុភា ជាអភិបាលរងខណ្ឌទួលគោក និង លោក កេត រតនា ជាអភិបាលរងខណ្ឌជ្រោយចង្វា។
លោក ឃួង ស្រេង មានប្រសាសន៍ថា ក្នុងរយៈពេល ១៧ ឆ្នាំ កន្លងទៅនេះ រដ្ឋបាលរាជធានីភ្នំពេញ បានធ្វើការស្ដារ អភិវឌ្ឍន៍រាជធានីភ្នំពេញ ឱ្យមានការរីកចម្រើនលើគ្រប់វិស័យ និងទទួលបាននូវភាពជោគជ័យជាច្រើន។
លោក ឃួង ស្រេង បានបន្តថា សម្រាប់ការប្រកាសចូលកាន់តំណែង និងផ្ទេរភារកិច្ច នៅថ្ងៃនេះ គឺជារឿងធម្មតាសម្រាប់មន្ត្រីរាជការស៊ីវិលដែលតែងតែត្រូវបានផ្លាស់ប្ដូរមុខតំណែង។ ជាក់ស្ដែងនៅពេលនេះ បានប្រកាសតែងតាំងផ្ទេរភារកិច្ចអភិបាលខណ្ឌចំនួន ២ រូប អភិបាលរងខណ្ឌជាច្រើនរូបទៀត។
លោក ឃួង ស្រេង ក៏បានជំរុញឱ្យអភិបាលខណ្ឌ អភិបាលរងខណ្ឌ ដែលត្រូវបានតែងតាំងផ្ទេរភារកិច្ចថ្មីនេះ ត្រូវយកចិត្តទុកដាក់បំពេញការងារឱ្យកាន់តែល្អប្រសើរ ដោយត្រូវពង្រឹងសមត្ថភាពឱ្យកាន់តែខ្លាំងក្លាក្នុងការបម្រើប្រជាពលរដ្ឋក្នុងមូលដ្ឋានរបស់ខ្លួន។ ក្នុងនាមជាអភិបាលខណ្ឌ អភិបាលរងខណ្ឌ ត្រូវដុសខាត់ ត្រូវក្រើនរំលឹក កែលម្អចំណុចខ្វះខាត មកបំពេញបន្ថែមឱ្យបានល្អប្រសើរ ហើយការកែលម្អចំណុចខ្វះខាតនោះ មិនត្រូវធ្វើឡើងចំណុចខ្វះខាតដដែលនោះទេ។ ត្រូវរក្សាឱ្យបានល្អប្រសើរនូវសន្តិសុខសណ្ដាប់ធ្នាប់សាធារណៈក្នុងមូលដ្ឋាន ផ្ដល់សេវាជូនប្រជាពលរដ្ឋកាន់តែល្អប្រសើរ។ ចំណែកការរក្សាអនាម័យ បរិស្ថាន ក្នុងនាម អាជ្ញាធរ ត្រូវតែយកចិត្តទុកដាក់ ដោយដាក់មន្ត្រីក្រោមឱវាទ ឱ្យតាមដានការអនុវត្ត ការដឹកជញ្ជូន ការប្រមូលសំរាមឱ្យអស់ពីមូលដ្ឋានរបស់ខ្លួន ពិសេសកុំឱ្យមានសំរាមនៅតាមប្រឡាយ និងប្រព័ន្ធលូបង្ហូរទឹក។
លោក ឃួង ស្រេង បន្តទៀតថា ក្នុងនាមជាគណៈបញ្ជាការឯកភាពខណ្ឌ គណៈបញ្ជាការឯកភាពសង្កាត់ ត្រូវការពារសន្តិសុខជូនប្រជាពលរដ្ឋឱ្យបានល្អ ១០០ ភាគតយ ដើម្បីជាទំនុកចិត្តសម្រាប់ប្រជាពលរដ្ឋ ហើយក៏ជាការកៀរគរភ្ញៀវជាតិ-អន្តរជាតិ ឱ្យមកដើរលេងកម្សាន្តនៅរាជធានីភ្នំពេញកាន់តែច្រើនផងដែរ។
ជាមួយនេះ លោក ឃួង ស្រេង ក៏បានជំរុញអាជ្ញាធរខណ្ឌទាំងអស់ លុបបំបាត់ឱ្យបាននូវការជក់បារីអេឡិចត្រូនិក ការលុបបំបាត់ទីតាំងកោសជប់នានាក្នុងមូលដ្ឋាន ពិសេសខណ្ឌនៅជាយក្រុង។
នាឱកាសនោះ លោក ចេង មុន្នីរ៉ា ដែលត្រូវបានប្រកាសផ្ទេរឱ្យមកកាន់មុខតំណែងជាអភិបាលខណ្ឌសែនសុខ បានប្ដេជ្ញាចិត្តថា ដើម្បីជាសក្ខីភាពឆ្លើយតបទៅនឹងទំនុកចិត្តរបស់រាជរដ្ឋាភិបាល ក៏ដូចជា ថ្នាក់ដឹកនាំគ្រប់លំដាប់ថ្នាក់ លោកនឹងខិតខំបំពេញការងារឱ្យបានម៉ឺងម៉ាត់បំផុត។
ប្ដេជ្ញាការពារដាច់ខាត រាជរដ្ឋាភិបាលស្របច្បាប់ដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្ត្រី។ ប្រឆាំងដាច់ខាតក្រុមជ្រុលនិយម និងថ្កោលទោសទាហានថៃដែលបាញ់ប្រហារប្រជាពលរដ្ឋខ្មែរ។ ទំនុកបម្រុងសមរភូមិមុខ និងការពង្រឹងការអនុវត្តភូមិ-សង្កាត់ មានសុវត្ថិភាព៕
