បេក្ខជនតំណាងរាស្រ្តមកពីគណបក្សភឿថៃ បានរិះគន់រដ្ឋាភិបាលដឹកនាំដោយនាយករដ្ឋមន្ត្រីចាំផ្ទះ លោក អានុទីន ឆានវីរៈគុល
បេក្ខជនតំណាងរាស្រ្តមកពីគណបក្សភឿថៃ បានរិះគន់រដ្ឋាភិបាលដឹកនាំដោយនាយករដ្ឋមន្ត្រីចាំផ្ទះ លោក អានុទីន ឆានវីរៈគុល និងស្ថាប័នរៀបចំការបោះឆ្នោតលើការធ្វើប្រជាមតិសំដៅធ្វើវិសោធនកម្មរដ្ឋធម្មនុញ្ញដ៏ចម្រូងចម្រាសរបស់ប្រទេសថៃដែលគេដឹងថា លម្អៀងទៅរកអំណាចយោធានិងស្ថាប័នរាជបល្ល័ង្ក។
សារព័ត៌មានថៃ Khaosod English ចេញផ្សាយនៅថ្ងៃទី១៩ខែមករានេះ ដោយស្រង់សម្តីលោក Somkid Cheukong បេក្ខជនតំណាងរាស្រ្តនៃគណបក្សភឿថៃ ដែលបានរិះគន់រដ្ឋាភិបាលរបស់លោកអានុទីន និងគណៈកម្មការរៀបចំការបោះឆ្នោតថា ពួកគេការបរាជ័យតាំងពីដំបូងក្នុងការបន្តធ្វើវិសោធនកម្មរដ្ឋធម្មនុញ្ញយ៉ាងពិតប្រាកដ ដោយចោទប្រកាន់ពួកគេថាបានរៀបចំអ្វីដែលលោកហៅថាជា «ពិធី» ដើម្បីបោកបញ្ឆោតសាធារណជន។
តាមសម្រង់សម្តីនោះ លោក Somkid បាននិយាយថា នៅសល់ពេលតិចជាង២០ថ្ងៃទៀត មុនពេលអ្នកបោះឆ្នោតថៃទូទាំងប្រទេសនឹងធ្វើការសម្រេចចិត្តដ៏សំខាន់មួយអំពីអនាគតរបស់ប្រទេស រួមទាំងការបោះឆ្នោតជ្រើសរើសសមាជិកសភា និងការធ្វើប្រជាមតិលើការធ្វើវិសោធនកម្មរដ្ឋធម្មនុញ្ញឆ្នាំ ២០១៧។
ចំណុចដែលបេក្ខជនតំណាងរាស្រ្តនៃគណបក្សភឿថៃចោទប្រកាន់នោះ គឺនៅត្រង់ថា ប្រជាជនថៃជាច្រើននៅតែមិនដឹងថា នៅថ្ងៃទី៨ខែកុម្ភៈ ក្រៅពីការបោះឆ្នោតក្នុងការបោះឆ្នោតទូទៅជ្រើសរើសតំណាងរាស្រ្ត ពួកគេក៏នឹងត្រូវបានស្នើសុំឱ្យបោះឆ្នោតក្នុងការធ្វើប្រជាមតិរដ្ឋធម្មនុញ្ញផងដែរ។
តាមការចុះផ្សាយដដែលនោះ លោក Somkid បាននិយាយថា ក្នុងអំឡុងពេលទស្សនកិច្ចសហគមន៍ក្នុងតំបន់ លោកមានការភ្ញាក់ផ្អើលដែលបានរកឃើញថា មនុស្សជាច្រើនបាននិយាយថា ពួកគេមិនដឹងអំពីការធ្វើប្រជាមតិនោះទេ។
លោក Somkid បាននិយាយថា ទាំងរដ្ឋាភិបាល និងគណៈកម្មការរៀបចំការបោះឆ្នោត ដែលទទួលខុសត្រូវដោយផ្ទាល់ចំពោះការរៀបចំការបោះឆ្នោត បានបរាជ័យក្នុងការផ្តល់អាទិភាពដល់ការយល់ដឹងរបស់សាធារណជន ទោះបីជាមានថវិកាច្រើនក៏ដោយ។ លោកបាននិយាយថា គ្មានយុទ្ធនាការសាធារណៈ ឬការផ្សព្វផ្សាយដែលមានអត្ថន័យណាមួយដើម្បីពន្យល់ពីរបៀបដែលការធ្វើប្រជាមតិកែប្រែរដ្ឋធម្មនុញ្ញនោះនឹងដំណើរការ ឬមូលហេតុដែលវាមានសារៈសំខាន់នោះទេ ក្រៅពីការចែកចាយសៀវភៅក្រាស់ៗដល់គ្រួសារនានា។
ប្រទេសថៃបានធ្លាក់ចុះទៅក្នុងវិបត្តិរដ្ឋធម្មនុញ្ញចាប់តាំងពីប្រទេសនេះបានប្រឈមរដ្ឋប្រហារជាច្រើនលើកទម្លាក់រដ្ឋាភិបាលស៊ីវិលកើតចេញពីការបោះឆ្នោត និងថែមទាំងបានរារាំងដល់ការចូលកាន់អំណាចរបស់គណបក្សឈ្នះឆ្នោតទៀតផង។ រដ្ឋធម្មនុញ្ញឆ្នាំ២០១៧ ដែលតាក់តែងឡើងដោយរដ្ឋាភិបាលយោធាដឹកនាំដោយនាយករដ្ឋមន្ត្រី ប្រាយុធ ចាន់អូចា បានផ្តល់អាទិភាពជ្រើសរើសនាយករដ្ឋមន្ត្រីទៅកាន់ព្រឹទ្ធសភាដែលកើតចេញពីការតែងតាំងនិងមានសមាជិក២៥០រូបមានសិទ្ធិចូលរួមបោះឆ្នោតជាមួយតំណាងរាស្ត្រ៕