អាមេរិកបន្តដកទណ្ឌកម្មលើប្រេងរុស្ស៊ី ៣០ ថ្ងៃទៀត ចំពេលការផ្គត់ផ្កង់សកលតឹងតែង
សហរដ្ឋអាមេរិកបានបន្ថែមពេលលើកលែងទណ្ឌកម្មលើប្រេងរបស់រុស្ស៊ីរយៈពេល ៣០ ថ្ងៃទៀត ចំពេលដែលការផ្គត់ផ្គង់ប្រេងសកលនៅតែតឹងតែង ហើយតម្លៃប្រេងអន្តរជាតិនៅតែខ្ពស់ជាង ១០០ ដុល្លារ/បារ៉ែល។
ការលើកលែងនេះ ធ្វើឡើងក្នុងបទបញ្ជាថ្មីពីការិយាល័យគ្រប់គ្រងទ្រព្យសម្បត្តិបរទេសនៃក្រសួងរតនាគារសហរដ្ឋអាមេរិក ដែលអនុញ្ញាតឱ្យប្រទេសនានាបន្តទិញប្រេងរុស្ស៊ីដែលជាប់គាំងលើដែនសមុទ្រ និងមានសុពលភាពដល់ថ្ងៃទី ១៧ ខែមិថុនា។
មែនទែនទៅ ចំណាត់ការដដែល ត្រូវបានដាក់ចេញដើម្បីជំនួសការលើកលែងចាស់ ដែលបានផុតកំណត់នៅថ្ងៃទី ១៦ ឧសភា។ យ៉ាងណាមិញ វាមិនអនុវត្តចំពោះប្រតិបត្តិការណាមួយដែលពាក់ព័ន្ធនឹងបុគ្គល ឬក្រុមហ៊ុនមកពីអ៊ីរ៉ង់ កូរ៉េខាងជើង គុយបា ឬតំបន់អ៊ុយក្រែនដែលគ្រប់គ្រងដោយរុស្ស៊ីនោះទេ។
សហរដ្ឋអាមេរិកបាននិយាយថា ការលើកទណ្ឌកម្មដដែល មានគោលបំណងរក្សាលំហូរប្រេងនៅលើទីផ្សារពិភពលោក និងការពារការកើនឡើងតម្លៃប្រេងឥន្ធនៈ និងអតិផរណាបន្ថែមទៀត។ លោក Scott Bessent រដ្ឋមន្ត្រីក្រសួងរតនាគារអាមេរិក បាននិយាយថា ការអនុញ្ញាតឱ្យរុស្ស៊ីលក់ប្រេងមួយចំនួន នឹងជួយផ្គត់ផ្គង់ដល់ប្រទេសដែលត្រូវការថាមពលខ្លាំងបំផុត និងកាត់បន្ថយសមត្ថភាពរបស់ចិន ក្នុងការស្ដុកប្រេងដែលរុស្ស៊ីលក់ឱ្យថោកៗ។
គួរគូសបញ្ជាក់ថា អាមេរិកបានចេញវិធានដកទណ្ឌកម្មលើប្រេងរបស់រុស្ស៊ីជាលើកដំបូងរយៈពេល ៣០ ថ្ងៃ បន្ទាប់ពីជម្លោះពាក់ព័ន្ធនឹងអ៊ីរ៉ង់បានបង្កឱ្យមានការព្រួយបារម្ភអំពីការផ្គត់ផ្គង់សកល និងបានជំរុញឱ្យតម្លៃប្រេងកើនឡើង ដោយសារតែការបិទខ្ទប់ច្រកសមុទ្រហ័រមូហ្ស៕