បុរសម្នាក់ ជាប់ចោទពីបទ«ឆបោក»ក្រោយក្លែងឯកសារដើម្បីប្រមូលលុយ ថាយកទៅជួយកងទ័ពនៅព្រំដែន
សាលាដំបូងខេត្តព្រះសីហនុ បានចោទប្រកាន់បុរសម្នាក់ ដែលជាមន្ត្រីជាប់កិច្ចសន្យានៅមន្ទីរទេសចរណ៍ខេត្ត ពីបទ«ឆបោក» ក្រោយជននេះ បានក្លែងបន្លំឯកសារដើម្បីប្រមូលប្រាក់ពីអាជីវករ និងថាយកប្រាក់នោះទៅជួយកងទ័ពនៅព្រំដែន។
បើតាមសេចក្ដីប្រកាសព័ត៌មាន អ្នកនាំពាក្យអយ្យការអមសាលាដំបូងខេត្តព្រះសីហនុ ចុះថ្ងៃទី៨ ខែមិថុនា ជនជាប់ចោទជាមន្ត្រីជាប់កិច្ចសន្យាមន្ទីរទេសចរណ៍ខេត្ត និងមានតួនាទីជាអ្នកវេចខ្ចប់សំបុត្រ និងចែកសំបុត្រ។
អ្នកនាំពាក្យអយ្យការអមសាលាដំបូងខេត្តព្រះសីហនុ បានរៀបរាប់អំពីសកម្មភាពឆបោក របស់ជនសង្ស័យ ថារូបគេបានទៅហាងថតចម្លងឯកសារមួយកន្លែង ដែលនៅម្ដុំផ្សារលើ និងបានឱ្យបុគ្គលិកនៅទីតាំងថតចម្លង វាយឯកសារតាមអ្វីដែលរូបគេប្រាប់។ ឯកសារនោះ មានខ្លឹមសារថា៖ «ក្នុងនាមខ្ញុំជារដ្ឋបាលសាលាខេត្ត សូមអំពាវនាវដល់អាជីវករទាំងអស់ ឱ្យចូលរួមបរិច្ចាគថវិកាបន្តិចបន្តួច ដើម្បីឧបត្ថម្ភជួយដល់បងៗទាហានការពារព្រំដែន ដើម្បីលើកទឹកចិត្តនិងជំនួយស្មារតី ឱ្យពួកគាត់តស៊ូដើម្បីជាតិមាតុភូមិ»។
បន្ទាប់មក ជនល្មើសក៏បោះពុម្ពឯកសារនោះចេញ រួចដាក់ចូលទៅក្នុងស្រោមសំបុត្រ ដែលជាស្រោមសំបុត្រផ្លូវការរបស់រដ្ឋបាលខេត្តព្រះសីហនុ ដែលនៅសល់ក្រោយពីជនល្មើសចែកសំបុត្រកន្លងមក។ ជនល្មើសបានយកសំបុត្រទាំងនោះ នៅឱ្យម្ចាស់សណ្ឋាគារនានា នៅក្នុងខេត្តព្រះសីហនុជាហូរហែ ដើម្បីស្នើសុំប្រាក់។ ជាលទ្ធផល ប្រមូលបានប្រាក់ប្រមាណ៥០ដុល្លារ។
ក្រោយការស្រាវជ្រាវ ជនល្មើសត្រូវបានសមត្ថកិច្ចឃាត់ខ្លួន ហើយត្រូវបានតំណាងអយ្យការសម្រេច បើកការចោទប្រកាន់រូបគេ បញ្ជូនទៅចៅក្រមស៊ើបសួរ នៃសាលាដំបូងខេត្តព្រះសីហនុ ពីបទឆបោកស្ថានទម្ងន់ទោស តាមបញ្ញត្តិ មាត្រា៣៧៧ មាត្រា៣៨០ ចំណុចទី២ និងទី៤ នៃក្រមព្រហ្មទណ្ឌ។
មាត្រា៣៨០ ចំណុចទី២ និងទី៤ នៃក្រមព្រហ្មទណ្ឌ ចែកថា បុគ្គលដែលតាំងខ្លួនជាអ្នករាជការសាធារណៈ និងបុគ្គលដែលអំពាវនាវដល់សាធារណជន ដើម្បីអង្គាសមូលនិធិសម្រាប់ជាជំនួយមនុស្សធម៌ ឬសង្គមកិច្ច ត្រូវផ្ដន្ទាទោសដាក់ពន្ធនាគារ២ឆ្នាំ ទៅឆ្នាំ៥ ពីអំពើឆបោក។
មាត្រា៣៧៧ បានពន្យល់ពីអំពើឆបោក ជាការបន្លំចំពោះរូបវន្តបុគ្គល ឬនីតិបុគ្គលណាមួយ ដោយប្រើឈ្មោះក្លែង ដោយអះអាងទៅលើឋានៈក្លែង ដោយរំលោភលើឋានៈពិតប្រាកដ ឬដោយប្រើឧបាយកលទុច្ចរិត៕