លោក ស្រ៊ុន ពៅ៖ កម្ពុជាមានសាច់គ្រប់គ្រាន់សម្រាប់បំពេញតម្រូវការពលរដ្ឋ ដោយមិនបាច់ពឹងថៃ
ភ្នំពេញ៖ «កម្ពុជាមានសាច់គ្រាប់គ្រាន់ សម្រាប់បំពេញតម្រូវការពលដ្ឋ ដោយមិនចាំបាច់ ពឹងផ្អែកការនាំចូលពីប្រទេសថៃ។ ការបិទច្រកព្រំដែននៅពេលនេះ គឺខាងថៃជាអ្នកខាត ព្រោះកម្ពុជាគ្រាន់តែអ្នកទិញប៉ុណ្ណោះ។ រីឯ ថៃជាអ្នកនាំចូល»។ នេះជាការអះអាងរបស់ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា ក្រោយអាជ្ញាធរថៃសម្រេចបិទច្រកព្រំដែនទាំងស្រុងជាមួយកម្ពុជា។
លោក ស្រ៊ុន ពៅ បានប្រាប់សារព័ត៌មានឌីជីថលថ្មីៗ នៅថ្ងៃទី ២៦ ខែមិថុនានេះថា បន្ទាប់ពី ថៃបានបិទច្រកព្រំដែនទាំងស្រុង ជាមួយកម្ពុជាជាឯកតោភាគី កាលពីថ្ងៃទី២៤ ខែមិថុនាមក លោក សង្កេតឃើញថា សាច់សត្វ ក៏ដូចជាទំនិញផ្សេងៗ មិនមានការនាំចេញចូលទៀតទេ។
ទាក់ទិនរឿងនេះ លោក ស្រ៊ុន ពៅ អះអាងថា កម្ពុជាមិនមានបញ្ហាចោទនោះទេ។ កម្ពុជាមានសាច់គ្រប់គ្រាន់ សម្រាប់បំពេញតម្រូវការក្នុងស្រុក ដោយមិនចាំបាច់ពឹងផ្អែកការនាំចូលពីថៃ។ មិនត្រឹមប៉ុណ្ណឹងទេ កម្ពុជា ក៏នៅសល់សាច់សម្រាប់នាំចេញទៅក្រៅប្រទេសដែរ បើសិនមានការបញ្ជាទិញ។
ចំពោះ ការបិទព្រំដែនលើកនេះ ភាគីថៃ គឺជាអ្នកខាត ព្រោះថាកម្ពុជាគ្រាន់តែអ្នកទិញប៉ុណ្ណោះ។ រីឯ ថៃគឺជាអ្នកនាំចូល ហើយថែមទាំងបានយកកម្ពុជាធ្វើជា «ផ្លូវ» នាំចេញសាច់ទៅកាន់វៀតណាមទៀតផង។
លោក ស្រ៊ុន ពៅ បន្ថែមដូច្នេះថា៖«ការពីថៃបើកច្រក គឺមានការប៉ះពាល់គ្នាបន្តិចបន្តួច តែបើបិទ គឺអត់ប៉ះពាល់ទេ។ ដូច្នេះ នេះគឺជាផលល្អសម្រាប់យើង ព្រោះថាយើងមានសាច់គ្រប់គ្រាន់ បម្រើឱ្យទីផ្សារក្នុងស្រុក ដោយមិនចាំបាច់ពឹងផ្អែកសាច់ដែលនាំចូលពីថៃនោះទេ។ បើថៃមិននាំចូល! ផលដែលខាតមិនមែនកម្ពុជាទេ គឺថៃដោយសារតែថៃជាអ្នកនាំគោ និងសាច់ផ្សេងៗ មិនត្រឹមតែនាំមកម្ពុជាទេ គឺនាំឆ្លងកាត់កម្ពុជាទៀតវៀតណាមទៀត។ ដូច្នេះ អ្នកខាតបង់ខ្លាំង គឺថៃហ្នឹងតែម្ដង»។
ក្នុងមួយថ្ងៃ ពលរដ្ឋកម្ពុជា ប្រើប្រាស់ជ្រូករស់អស់ប្រមាណ ១០ ០០០ក្បាល, មាន់ខ្ទង់ ២០០ ០០០ក្បាល និងបន្ទាប់សន្សំដោយត្រី គោ ក្របី និងសាច់សត្វជាច្រើនប្រភេទទៀត។ ដោយឡែក ការនាំចូលបន្លែ ត្រីសាច់ ពីបរទេស កំពុងបង្កផលប៉ះពាល់យ៉ាងធ្ងន់ធ្ងរដល់សុខភាពសាធារណៈ ជាពិសេសជំងឺមហារីក។ ក្នុងមួយឆ្នាំៗ កម្ពុជាមានអ្នកកើតជំងឺមហារីកប្រមាណ ២០ ០០០ករណី ក្នុងនោះស្លាប់ប្រហែល ១៤ ០០០នាក់ក្នុងមួយឆ្នាំៗ។ ភ្ជាប់នឹងរឿងនេះដែរ លោក ស្រ៊ុន ពៅ យល់ថាការបិទសាច់នាំចូលពីប្រទេសថៃនៅពេលនេះ អាចជួយ ទប់ស្កាត់ផលប៉ះពាល់សុខភាពមួយផ្នែករបស់ពលរដ្ឋ។
ប្រធានសមាគមអ្នកចិញ្ចឹមសត្វរូបនេះ បានបន្តអំពាវនាវពលរដ្ឋ និងចុងភៅទាំងអស់ កាត់បន្ថយការប្រើប្រាស់សាច់ដែលនាំគ្មានប្រភពច្បាស់លាស់ និងងាកមកគាំទ្រសាច់ក្នុងស្រុកវិញ ដើម្បីសុខភាព និងជួយជំរុញកំណើនសេដ្ឋកិច្ចជាតិ។
លោក បន្ថែមដូច្នេះថា៖«និយាយតាមត្រង់ទៅ បើសិនពលរដ្ឋយើងនាំគ្នាគាំទ្រ ផលិតផលក្នុងស្រុក គឺល្អបំផុត។ ឥឡូវ យើងកើតមហារីកអត់ដឹងខ្លួនផងហ្នឹង? ដូច្នេះ បានខ្ញុំសូមឱ្យបងប្អូនយើងទាំងអស់ ងាកមកគាំទ្រផលិតផលក្នុងស្រុក ដែលមានគុណភាព ហើយស្ដង់ដា ដើម្បីសុខសុវត្ថិភាព សុខភាពបងប្អូនយើងទេ»៕
