បទល្មើសបច្ចេកវិទ្យា! ជនសង្ស័យជាង៣ពាន់នាក់ត្រូវបានឃាត់ខ្លួន ដោយជនជាតិចិន និងវៀតណាមច្រើនជាងគេ
ភ្នំពេញ៖ ទីតាំងប្រព្រឹត្តបទល្មើសតាមប្រព័ន្ធបច្ចេកវិទ្យា ចំនួន ១៣៨ទីតាំង ត្រូវបានសមត្ថកិច្ចបង្ក្រាបបាន និងឃាត់ខ្លួនជនសង្ស័យ បានចំនួន ៣ ០៧៥នាក់ គិតចាប់ពីថ្ងៃទី២៧ ខែមិថុនា ដល់ថ្ងៃទី២២ ខែកក្កដា ឆ្នាំ២០២៥។ នេះបើតាមរបាយការណ៍ដែលផ្តល់ដោយលោក នេត្រ ភក្ត្រា រដ្ឋមន្រ្តីក្រសួងព័ត៌មាន។ តាមរបាយការណ៍ ក្នុងចំណោមជនសង្ស័យដែលឃាត់ខ្លួននោះ ជនជាតិចិន និងវៀតណាម មានច្រើនជាងគេ បន្ទាប់មកគឺជនជាតិ ឥណ្ឌូណេស៊ី ឥណ្ឌា បង់ក្លាដេស និងជនជាតិថៃ។
លេខាធិការដ្ឋាន នៃគណៈកម្មការចំពោះកិច្ចប្រយុទ្ធប្រឆាំងការឆបោក តាមប្រព័ន្ធបច្ចេកវិទ្យា(គ.ប.ឆ.ប) នៅថ្ងៃទី២៣ ខែកក្កដានេះ បានបង្ហាញលទ្ធផលបង្ក្រាបឆបោកតាមប្រព័ន្ធបច្ចេកវិទ្យានៅទូទាំង ក្នុងរយៈពេល២៧ថ្ងៃ បាន១៣៨ទីតាំង។ ក្នុងចំណោមទីតាំងទាំងនេះ អាជ្ញាធរ សង្គ្រោះជនរងគ្រោះជនជាតិវៀតណាមចំនួន១៥៣នាក់ ចេញពីទីតាំងមួយកន្លែង ក្នុងខេត្តពោធិ៍សាត់។
ជាមួយគ្នានេះ នៅ១៣៨ទីតាំងដែលត្រូវបានបង្ក្រាបនោះ សមត្ថកិច្ចបានឃាត់ឡានដឹក ជនបរទេស ២០ ករណី។ ប៉ុន្តែមាន១ករណី ក្នុងខេត្តតាកែវ រកពុំឃើញជនសង្ស័យឡើយខេត្តតាកែវ។ ទន្ទឹមនឹងនេះ ប៉ូលិសបានចុះបង្ក្រាបបណ្ដារាជធានីខេត្ត រួមមាន រាជធានីភ្នំពេញ កណ្តាល ព្រះសីហនុ កំពង់ស្ពឺ បន្ទាយមានជ័យ ក្រចេះ ពោធិ៍សាត់ កំពត កោះកុង ឧត្ដរមានជ័យ ស្ទឹងត្រែង មណ្ឌលគិរី ប៉ៃលិន តាកែវ ស្វាយរៀង សៀមរាប និងត្បូងឃ្មុំ។
បើតាមរបាយការណ៍ ប្រតិបត្តិការនៅ១៣៨ទីតាំងនោះ អាជ្ញាធរឃាត់ខ្លួនបានជនសង្ស័យ សរុប ៣ ០៧៥នាក់ ក្នុងនោះមានស្រី៦០៦នាក់។ ចំណោមជនសង្ស័យទាំងអស់ មានជន ជាតិចិនចំនួន១ ០២៨ នាក់, វៀតណាម ៦៩៣នាក់, ឥណ្ឌូណេស៊ី ៣៦៦នាក់, ឥណ្ឌា១០៥ នាក់, បង់ក្លាដែស១០១នាក់, ថៃ៨២នាក់, កូរ៉េ៥៧នាក់, ប៉ាគីស្ថាន៨១នាក់,នេប៉ាល់១៣នាក់, ម៉ាឡេស៊ី៤នាក់។ ក្រៅពីនេះក៏មានជនជាតិផ្សេងៗទៀតដែរ ដូចជា ហ្វីលីពីន ឡាវ នីហ្សេរីយ៉ា ម៉ុងហ្គោលី រុស្ស៊ី មីយ៉ាន់ម៉ាជាដើម។
ករណីបង្ក្រាបខាងលើ សមត្ថកិច្ចជំនាញ រកមុខសញ្ញាមេក្លោងឃើញ១១នាក់ ពួកគេ ត្រូវបានបញ្ជូនទៅតុលាការ ហើយក្នុងនោះ តុលាការសម្រេចឃុំខ្លួនបណ្តោះអាសន្ន៨នាក់។ ទន្ទឹមនឹងនេះ មានជនសង្ស័យ១៧នាក់ ត្រៀមមបណ្ដេញចេញ។
ចំពោះវត្ថុតាងវិញ សមត្ថកិច្ចរកឃើញភាគច្រើនមានកុំព្យូទ័រ ទូរសព្ទ ម្សៅអេស្ដាស៊ី (ថ្នាំញៀ ន) ជញ្ជីងថ្លឹងគ្រឿងញៀន សារធាតុញៀននិងឧបករណ៍កែច្នៃគ្រឿងញៀន មួយចំនួនដែរ។ ក្រៅពីនេះ ក៏មានសម្លៀកបំពាក់ទម្រង់ជាឯកសណ្ឋានប៉ូលិសចិនមួយចំនួន អាវុធ និងគ្រាប់កាំភ្លើង។
យុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (Online Scams) នៅទូទាំងប្រទេស ចាប់ពីថ្ងៃទី១៥ ខែកក្កដា តាមការបញ្ជារបស់ សម្តេច ហ៊ុន ម៉ាណែត នាយករដ្ឋមន្ត្រី ។ បន្ទាប់មកកម្លាំងសមត្ថកិច្ចនៅតាមរាជធានី-ខេត្ត បានចាប់បង្ក្រាបទីតាំងប្រព្រឹត្តបទ ល្មើសឆបោក តាមប្រព័ន្ធបច្ចេកវិទ្យាយ៉ាងផុសផុល។
សូមជម្រាបដែរថា របាយការណ៍ឆមាសទី១ ឆ្នាំ២០២៥ របស់ក្រសួងមហាផ្ទៃ បង្ហាញថា នគរបាលបង្ក្រាបបទល្មើសបច្ចេកវិទ្យា (Online Scams) បាន១៨ករណី ក្នុងនោះឃាត់ខ្លួនបាន ២ ៤១៨នាក់។ ជនសង្ស័យភាគច្រើន មាន ជនជាតិខ្មែរ ចិន ថៃ មីយ៉ាន់ម៉ា វៀតណាម ឡាវ ឥណ្ឌា ប៉ាឡេស្ទីន ឥណ្ឌូណេស៊ី និងម៉ាឡេស៊ី៕