ជនជាតិវៀតណាមបាញ់កាំជ្រួចថ្ងៃសែនព្រះខែ បង្កការភ្ញាក់ផ្អើលដល់ពលរដ្ឋ ត្រូវសមត្ថកិច្ចចុះឃាត់ខ្លួន
នៅយប់ថ្ងៃទី ០៦ ខែតុលា ឆ្នាំ ២០២៥ មានករណីជនជាតិវៀតណាមបានដុតកាំជ្រួចខ្នាតធំសែនព្រះខែ បណ្តាលឱ្យមានការផ្អើលទាំងកណ្ដាលយប់ ស្ថិតក្នុងភូមិសាស្ត្រភូមិក្បាលស្ពានមួយ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។
តាមប្រភពព័ត៌មានបានឱ្យដឹងថា ក្រោយជ្រាបករណីនេះ នៅវេលាម៉ោងប្រមាណ ១០ យប់ ថ្ងៃទី ០៦ ខែតុលា ឆ្នាំ ២០២៥ កម្លាំងសមត្ថកិច្ចជំនាញបានចុះស្រាវជ្រាវរកឃើញផ្ទះមួយកន្លែង បានដុតកាំជ្រួចនៅពេលសែនព្រះខែពេលយប់ និង បានឃើញសម្បកគ្រាប់កាំជ្រួចប្រមាណជាង ៧០ រន្ធ ខណៈម្ចាស់ផ្ទះខាងលើបានបាញ់ដោយមិនបានសុំច្បាប់អនុញ្ញាត ធ្វើឱ្យប្រជាពលរដ្ឋក្នុងមូលដ្ឋានមានការភ្ញាក់ផ្អើលទាំងកណ្តាលយប់។
ករណីនេះ សមត្ថកិច្ចបាននាំខ្លួនជនជាតិវៀតណាម ៣ នាក់ មានស្រី ២ នាក់ ទៅសួរនាំនៅប៉ុស្តិ៍នគរបាលសង្កាត់អូរជ្រៅ ដើម្បីធ្វើកិច្ចសន្យាណែនាំ ខណៈការដុតកាំជ្រួវបែបនេះ បង្កឱ្យមានការភ្ញាក់ផ្អើលដល់ប្រជាពលរដ្ឋក្រុងប៉ោយប៉ែត ស្របពេលដែលសភាពការតាមបន្ទាត់ព្រំដែនមានភាពតានតឹង ទើបមិនអនុញ្ញាតិឱ្យមានការដុត ឬ បាញ់កាំជ្រួចនោះទេ៕
