ចិន ចោទប្រកាន់អាមេរិកថា លួចការសម្ងាត់ និងជ្រៀតចូលមជ្ឈមណ្ឌលពេលវេលាជាតិ ដោយបំពានធ្ងន់ធ្ងរដល់ប្រព័ន្ធទំនាក់ទំនង

(បរទេស)៖ ក្រសួងសន្តិសុខរដ្ឋរបស់ចិនបាននិយាយនៅក្នុងសេចក្តីថ្លែងការណ៍មួយនៅលើគណនី WeChat របស់ខ្លួនកាលពីថ្ងៃអាទិត្យថា ចិនបានចោទប្រកាន់សហរដ្ឋអាមេរិកថា បានលួចការសម្ងាត់ និងបានជ្រៀតចូលទៅក្នុង មជ្ឈមណ្ឌលសេវាកម្មពេលវេលាជាតិ (National Time Service Center) របស់ប្រទេសចិន ដោយព្រមានថាការបំពានដ៏ធ្ងន់ធ្ងរនេះអាចនឹងធ្វើឲ្យបណ្តាញទំនាក់ទំនង, ប្រព័ន្ធហិរញ្ញវត្ថុ, ការផ្គត់ផ្គង់ថាមពល និងពេលវេលាស្តង់ដារអន្តរជាតិមានការរំខាន។

ក្រសួងនេះបានបញ្ជាក់ថា ទីភ្នាក់ងារសន្តិសុខជាតិអាមេរិក (NSA) បានធ្វើប្រតិបត្តិការវាយប្រហារតាមអ៊ីនធឺណិតទៅលើមជ្ឈមណ្ឌលសេវាកម្មពេលវេលាជាតិក្នុងរយៈពេលដ៏យូរ និងបាននិយាយថា ខ្លួនបានរកឃើញភស្តុតាងដែលតាមដានទិន្នន័យ និងព័ត៌មានសម្ងាត់ (credentials) ដែលត្រូវបានលួចតាំងពីឆ្នាំ ២០២២ ដែលត្រូវបានប្រើដើម្បីលួចមើលឧបករណ៍ចល័ត (mobile devices) របស់បុគ្គលិក និងប្រព័ន្ធបណ្តាញ (network systems) នៅឯមជ្ឈមណ្ឌលនេះ។

ក្រសួងបានបន្ថែមថា ទីភ្នាក់ងារចារកម្មអាមេរិកបាន «ទាញយកប្រយោជន៍ពីភាពងាយរងគ្រោះ (exploited a vulnerability)» នៅក្នុងសេវាកម្មផ្ញើសារ (messaging service) នៃម៉ាកទូរសព្ទឆ្លាតបរទេសមួយ ដើម្បីចូលប្រើប្រាស់ឧបករណ៍របស់បុគ្គលិកនៅឆ្នាំ ២០២២ ដោយមិនបានបញ្ចេញឈ្មោះម៉ាកយីហោនោះទេ។

មជ្ឈមណ្ឌលពេលវេលាជាតិគឺជាវិទ្យាស្ថានស្រាវជ្រាវមួយចំណុះឲ្យបណ្ឌិត្យសភាវិទ្យាសាស្ត្រចិន (Chinese Academy of Sciences) ដែលបង្កើត, រក្សា និងផ្សាយពេលវេលាស្តង់ដាររបស់ប្រទេសចិន។

ការស៊ើបអង្កេតរបស់ក្រសួងក៏បានរកឃើញផងដែរថា សហរដ្ឋអាមេរិកបានបើកការវាយប្រហារលើប្រព័ន្ធបណ្តាញផ្ទៃក្នុងរបស់មជ្ឈមណ្ឌល ហើយបានព្យាយាមវាយប្រហារលើ ប្រព័ន្ធកំណត់ពេលវេលាដែលមានភាពជាក់លាក់ខ្ពស់នៅលើដី (high-precision ground-based timing system) នៅក្នុងឆ្នាំ ២០២៣ និង ២០២៤។

ស្ថានទូតអាមេរិកនៅទីក្រុងប៉េកាំងមិនបានឆ្លើយតបចំពោះការចោទប្រកាន់នេះដោយផ្ទាល់ទេ ប៉ុន្តែបាននិយាយថា តួអង្គតាមអ៊ីនធឺណិតដែលមានមូលដ្ឋាននៅប្រទេសចិនបានធ្វើឲ្យបណ្តាញក្រុមហ៊ុនទូរគមនាគមន៍សំខាន់ៗរបស់អាមេរិក និងសកលលោកមានភាពងាយរងគ្រោះ ដើម្បីធ្វើប្រតិបត្តិការ ចារកម្មតាមអ៊ីនធឺណិតដ៏ធំ និងសំខាន់ (broad significant cyber espionage campaigns)។

អ្នកនាំពាក្យស្ថានទូតបានប្រាប់សារព័ត៌មាន Reuters តាមរយៈអ៊ីមែលថា៖ «ចិនគឺជាការគំរាមកំហែងតាមអ៊ីនធឺណិតដែលសកម្មបំផុត និងអចិន្ត្រៃយ៍បំផុតចំពោះរដ្ឋាភិបាល, វិស័យឯកជន និងបណ្តាញហេដ្ឋារចនាសម្ព័ន្ធសំខាន់ៗរបស់សហរដ្ឋអាមេរិក»។

ប្រទេសចិន និងសហរដ្ឋអាមេរិកបានផ្លាស់ប្តូរការចោទប្រកាន់គ្នាទៅវិញទៅមកកាន់តែខ្លាំងឡើងៗ អំពីការវាយប្រហារតាមអ៊ីនធឺណិតក្នុងរយៈពេលប៉ុន្មានឆ្នាំចុងក្រោយនេះ ដោយភាគីនីមួយៗបានបង្ហាញថា ភាគីម្ខាងទៀតគឺជាការគំរាមកំហែងតាមអ៊ីនធឺណិតចម្បងរបស់ខ្លួន។

ការចោទប្រកាន់ចុងក្រោយនេះបានកើតឡើងចំពេលមានភាពតានតឹងផ្នែកពាណិជ្ជកម្មជាថ្មីម្តងទៀតលើ ការត្រួតពិនិត្យការនាំចេញរ៉ែដីកម្រ (rare earths export controls) ដែលបានពង្រីករបស់ចិន និងការគំរាមកំហែងរបស់សហរដ្ឋអាមេរិកក្នុងការដំឡើងពន្ធបន្ថែមទៀតលើទំនិញរបស់ចិន៕