អាមេរិកបានប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារថា ខ្លួននឹងដាក់ចេញ និងអនុវត្តទណ្ឌកម្មលើប្រទេសវ៉េណេស៊ុយអេឡា…

អាមេរិកបានប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារថា ខ្លួននឹងដាក់ចេញ និងអនុវត្តទណ្ឌកម្មលើប្រទេសវ៉េណេស៊ុយអេឡា«ក្នុងកម្រិតអតិបរមា» ក្នុងគោលបំណងកាត់ផ្ដាច់ខ្សែជីវិតហិរញ្ញវត្ថុរបស់រដ្ឋាភិបាលប្រធានាធិបតី នីកូឡាស ម៉ាឌូរ៉ូ ខណៈដែលរុស្ស៊ីបានព្រមានថា យុទ្ធនាការនេះអាចក្លាយជាគំរូសម្រាប់សកម្មភាពរបស់អាមេរិកនាពេលអនាគត ប្រឆាំងនឹងរដ្ឋផ្សេងទៀតនៅអាមេរិកឡាទីន។

លោក Mike Waltz ឯកអគ្គរដ្ឋទូតអាមេរិកប្រចាំអង្គការសហប្រជាជាតិ បានលើកឡើងថា ទីក្រុងវ៉ាស៊ីនតោនចាត់ទុកការដឹកជញ្ជូនប្រេងដែលរងទណ្ឌកម្ម គឺជាប្រភពចំណូលចម្បងដែលទ្រទ្រង់ «របបខុសច្បាប់» របស់លោកម៉ាឌូរ៉ូ ដោយចោទប្រកាន់របបនេះថាមានទំនាក់ទំនងជាមួយឧក្រិដ្ឋកម្មឆ្លងដែន និងការជួញដូរគ្រឿងញៀន។

ការលើកឡើងនេះ បានកើតឡើងចំពេលមានការកើនឡើងនៃសកម្មភាពយោធារបស់អាមេរិកនៅតំបន់ការ៉ាប៊ីន និងតាមបណ្តោយឆ្នេរសមុទ្រប៉ាស៊ីហ្វិកនៃអាមេរិកឡាទីន។ រដ្ឋបាលរបស់ប្រធានាធិបតី ដូណាល់ ត្រាំ បានពង្រីកប្រតិបត្តិការតាមសមុទ្រដែលកំណត់គោលដៅលើនាវាដែលសង្ស័យថាដឹកប្រេងវ៉េណេស៊ុយអេឡា ដែលរំលោភលើទណ្ឌកម្មរបស់អាមេរិក និងបានគំរាមកំហែងពីការវាយប្រហារដែលអាចកើតមានលើទឹកដីវ៉េណេស៊ុយអេឡា៕