គ្រោះថ្នាក់ចរាចរណ៍រវាងឡាន និងគោយន្តកន្ត្រៃ បណ្តាលឱ្យមនុស្សម្នាក់ស្លា.ប់ និង២នាក់រ.ង.រ.បួ.ស
ខេត្តក្រចេះ ៖ ករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងរថយន្ត និងគោយន្តកន្ត្រៃ បណ្តាលឱ្យមនុស្សម្នាក់បាត់បង់ជីវិតភ្លាមៗនៅនឹងកន្លែងកើតហេតុ និង២នាក់ទៀតរងរបួសស្រាល កាលពីវេលាម៉ោង២១ និង៤០នាទីយប់ ថ្ងៃទី៣១ ខែកក្កដា ឆ្នាំ២០២៦ ស្ថិតនៅលើកំណាត់ផ្លូវក្នុងភូមិរកាធំ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ។
យោងតាមរបាយការណ៍ផ្លូវការពីមូលដ្ឋានកងរាជអាវុធហត្ថស្រុកព្រែកប្រសព្វបានឱ្យដឹងថា មុនពេលកើតហេតុ មានរថយន្តម៉ាកកាមេរី (Camry) ពណ៌មាស ពាក់ស្លាកលេខភ្នំពេញ 2C-2043 បើកបរក្នុងទិសដៅស្របគ្នានឹងគោយន្តកន្ត្រៃ។ រថយន្តនេះបើកបរដោយឈ្មោះ ឈាន ភក្ក្រា ភេទប្រុស អាយុ៣៩ឆ្នាំ មានទីលំនៅសង្កាត់អូរឬស្សី ក្រុងក្រចេះ របួសស្រាល។
ក្នុងហេតុការណ៍នោះ រថយន្តបានបុកគោយន្តកន្ត្រៃពីខាងក្រោយពេញទំហឹង បណ្តាលឱ្យអ្នករួមដំណើរម្នាក់ឈ្មោះ កៀន ឡៃ ភេទប្រុស អាយុ៤៨ឆ្នាំ មានទីលំនៅភូមិល្អៀត ឃុំជ្រោយបន្ទាយ ស្រុកព្រែកប្រសព្វ បានស្លាប់បាត់បង់ជីវិតយ៉ាងអាណោចអាធ័មនៅនឹងកន្លែងកើតហេតុ ។ ចំណែកអ្នករួមដំណើរក្នុងរថយន្តម្នាក់ទៀត ឈ្មោះ ឃ្នី ភេទប្រុស អាយុ៣៨ឆ្នាំ មានទីលំនៅភូមិវឌ្ឍនៈ ឃុំវឌ្ឍនៈ ស្រុកសំបូរ រងរបួសស្រាល ។ ដោយឡែក អ្នកបើកបរគោយន្តកន្ត្រៃ បានរត់គេចខ្លួនបាត់ពីកន្លែងកើតហេតុភ្លាមៗ បន្ទាប់ពីការប៉ះទង្គិចគ្នា ។
ប្រភពដដែលបានបន្តថា មូលហេតុបង្កឱ្យមានគ្រោះថ្នាក់នេះ គឺបណ្តាលមកពីកត្តាសុវត្ថិភាពបច្ចេកទេសយានយន្ត ដោយរថយន្តបង្កមានប្រព័ន្ធភ្លើងបំភ្លឺខាងមុខមិនសូវភ្លឺច្បាស់លាស់ រួមផ្សំជាមួយនឹងការបើកបរនៅពេលយប់ងងឹត ។ បច្ចុប្បន្ន អ្នករងរបួសស្រាលទាំង២នាក់ ត្រូវបានបញ្ជូនទៅសង្គ្រោះ និងពិនិត្យព្យាបាលនៅមន្ទីរពេទ្យបង្អែកខេត្តក្រចេះ ។
ចំណែកសពជនរងគ្រោះ ត្រូវបានសមត្ថកិច្ចប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី។ ចំពោះវត្ថុតាងរថយន្តបង្កដែលរងការខូចខាតធ្ងន់ធ្ងរ ត្រូវបានសមត្ថកិច្ចយកទៅរក្សាទុកជាបណ្តោះអាសន្ននៅប៉ុស្តិ៍រដ្ឋបាលឃុំជ្រោយបន្ទាយ ដើម្បីកសាងសំណុំរឿងតាមនីតិវិធី ៕
