អាមេរិក និងអាស៊ាន ទាមទារឱ្យរបបយោធាមីយ៉ាន់ម៉ា ដោះលែង លោកស្រី អ៊ុងសាន ស៊ូជី ជាបន្ទាន់
សហរដ្ឋអាមេរិក និងប្លុកដ៏មានឥទ្ធិពលនៃប្រជាជាតិអាស៊ីអាគ្នេយ៍(អាស៊ាន) បានចេញសេចក្តីថ្លែងការណ៍ដាច់ដោយឡែកពីគ្នា ដោយទាមទារឱ្យមានការដោះលែងអតីតមេដឹកនាំភូមា លោកស្រី អ៊ុងសាន ស៊ូជី ដោយគ្មានលក្ខខណ្ឌ។ នេះបើយោងតាមការចុះផ្សាយរបស់សារព័ត៌មាន The Independent នៅថ្ងៃទី០៧ ខែសីហា ឆ្នាំ២០២៦ ។
សេចក្តីថ្លែងការណ៍ទាំងនេះ ត្រូវបានចេញផ្សាយប៉ុន្មានថ្ងៃ បន្ទាប់ពីលោកស្រី ស៊ូជី បានចួបជាមួយមន្ត្រីការបរទេសអាមេរិកលើកដំបូងក្នុងរយៈពេលជាង ៥ឆ្នាំ ចាប់តាំងពីលោកស្រី ត្រូវបានបណ្តេញចេញពីអំណាច និងឃុំខ្លួននៅឆ្នាំ ២០២១ ។
ទាំងសហរដ្ឋអាមេរិក និងហ្វីលីពីន ដែលជាប្រធានសមាគមប្រជាជាតិអាស៊ីអាគ្នេយ៍ មានសមាជិក ១១ប្រទេស បានអំពាវនាវឱ្យមានការដោះលែង លោកស្រី ស៊ូជី និងអ្នកដទៃទៀតជាបន្ទាន់។
ប្រធានអាស៊ានលើកឡើងក្នុងសេចក្តីថ្លែងការណ៍ថា៖ « យើងសូមអំពាវនាវឱ្យមានការដោះលែង អ្នកដែលបានឃុំខ្លួនក្នុងប្រទេសមីយ៉ាន់ម៉ា ចាប់តាំងពីខែកុម្ភៈ ឆ្នាំ២០២១ ហើយសូមបញ្ជាក់ជាថ្មីនូវការអំពាវនាវរបស់យើង សម្រាប់ការដោះលែងពួកគេ រួមទាំងការដោះលែង ចំពោះ លោកស្រី អ៊ុងសាន ស៊ូជី ទាំងស្រុងនិងដោយគ្មានលក្ខខណ្ឌ» ។
ប្លុកនេះនិយាយថា ខ្លួនសង្ឃឹមថាដំណើរទស្សនកិច្ចរបស់មន្រ្តីអាមេរិកនឹងបើកផ្លូវសម្រាប់ លោកស្រី ស៊ូជី ប្រកបដោយចីរភាពសម្រាប់ក្រុមគ្រួសារ មេធាវី វេជ្ជបណ្ឌិត និងអង្គការមនុស្សធម៌របស់លោកស្រី។ វាជាជំហានវិជ្ជមានឆ្ពោះទៅរកការសន្ទនា និងការផ្សះផ្សារវាងគ្រប់ភាគីទាំងអស់ក្នុងប្រទេសមីយ៉ាន់ម៉ា។ អាស៊ានបានចាត់ទុកកិច្ចប្រជុំនេះ ជាផ្នែកមួយនៃកិច្ចខិតខំប្រឹងប្រែងរបស់មីយ៉ាន់ម៉ាឆ្ពោះទៅរកសន្តិភាព និងការផ្សះផ្សា។
ក្នុងសេចក្តីថ្លែងការណ៍ដាច់ដោយឡែកមួយ បង្ហោះលើបណ្តាញសង្គម X ដោយស្ថានទូតសហរដ្ឋអាមេរិកប្រចាំប្រទេសមីយ៉ាន់ម៉ា និងចេញផ្សាយតាមរយៈក្រសួងការបរទេស ទីក្រុងវ៉ាស៊ីនតោនបានអំពាវនាវឱ្យមានការដោះលែង លោក ស្រី អ៊ុងសាន ស៊ូជី ជាបន្ទាន់ និងដោយគ្មានលក្ខខណ្ឌ។
សេចក្តីថ្លែងការណ៍ថា៖ « យើងសង្ឃឹមថាដំណើរទស្សនកិច្ចនេះបង្ហាញពីការចាប់ផ្តើមនៃការចូលដំណើរការមនុស្សធម៌ ចំពោះ លោកស្រី អ៊ុងសាន ស៊ូជី និងបម្រើជាផ្លូវមួយដល់អ្នកទោសនយោបាយទាំងអស់…»៕