បុគ្គលិកក្រុមហ៊ុនដឹកជញ្ជូនម្នាក់ ត្រូវរថយន្តធុនធ្ងន់កិនស្លាប់លើផ្លូវ៦០ម៉ែត្រ
រាជធានីភ្នំពេញ ៖ យុវជនម្នាក់ជាបុគ្គលិកក្រុមហ៊ុនដឹកជញ្ជូន WOW NOW បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ ក្នុងគ្រោះថ្នាក់ចរាចរណ៍ដ៏រន្ធត់មួយលើផ្លូវ៦០ម៉ែត្រ ចំណុចមុខផ្សារទំនើបអ៊ីអន៣ ។
ហេតុការណ៍នេះបានកើតឡើងកាលពីវេលាម៉ោង០២និង១០នាទីរសៀល ថ្ងៃទី១៨ ខែកញ្ញា ឆ្នាំ២០២៦ តាមបណ្តោយផ្លូវ៦០ម៉ែត្រ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
ជនរងគ្រោះត្រូវបានគេស្គាល់អត្តសញ្ញាណឈ្មោះ អុម ថុនសិដ្ឋ អាយុ ២៥ឆ្នាំ មានមុខរបរជាបុគ្គលិកដឹកជញ្ជូន (Delivery) ឱ្យក្រុមហ៊ុន WOW NOW ។
តាមប្រភពព័ត៌មានបានអោយដឹងថា មុនកើតហេតុ ជនរងគ្រោះបើកបរម៉ូតូមួយគ្រឿង ក្នុងទិសដៅពីជើងទៅត្បូង តាមបណ្តោយផ្លូវ ៦០ម៉ែត្រ។ លុះមកដល់ចំណុចគ្រោះថ្នាក់ ម៉ូតូរបស់ជនរងគ្រោះបានទាក់ដៃចង្កូងជាមួយម៉ូតូមួយគ្រឿងទៀត (មិនស្គាល់ម៉ាក និងស្លាកលេខ) បណ្តាលឱ្យដួលទៅលើទ្រូងផ្លូវ។ ស្របពេលនោះមានរថយន្តបែនដឹកដី មួយគ្រឿង បើកបរស្របទិសគ្នាមកពីខាងក្រោយ បានកិនចំក្បាលជនរងគ្រោះ បណ្តាលឱ្យស្លាប់បាត់បង់ជីវិតភ្លាមៗតែម្តង ។
ក្រោយកើតហេតុ កម្លាំងសមត្ថកិច្ចមូលដ្ឋាន សហការជាមួយកម្លាំងជំនាញនគរបាលចរាចរណ៍ខណ្ឌមានជ័យ និងការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានចុះអន្តរាគមន៍ពិនិត្យ និងវាស់វែងទីតាំងកើតហេតុ ព្រមទាំងធ្វើកំណត់ហេតុប្រគល់សពជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕
