ក្រសួងបរិស្ថានចាត់វិធានការច្បាប់ចំពោះសិប្បកម្មកែច្នៃ និង វេចខ្ចប់កាកស្រាបៀរផលិតជាចំណីសត្វមួយកន្លែងនៅខេត្តកំពង់ស្ពឺ ដែលបំពុលខ្យល់ និងមានក្លិនស្អុយ
ភ្នំពេញ៖ ក្រសួងបរិស្ថានបានរកឃើញសិប្បកម្មកែច្នៃ និងវេចខ្ចប់កាកស្រាបៀរមួយកន្លែងស្ថិតនៅភូមិស្នួលជ្រុំ ឃុំទឹកល្អក់ ស្រុកគងពិសី ខេត្តកំពង់ស្ពឺ ដែលបានបង្កឱ្យមានការបំពុលខ្យល់ និងមានក្លិនស្អុយហុយចេញពីបំពង់ផ្សែង។
ក្រសួងបរិស្ថានបានឱ្យដឹងនៅថ្ងៃទី២៤ ខែ សីហា ឆ្នាំ២០២៥នេះថា ម្ចាស់ទីតាំងដែលបង្កបញ្ហាដល់សុខភាពឈ្មោះលោក ស្រី នុត សុខណាវី។ក្រុមការងារក្រសួងបរិស្ថានបានធ្វើតេស្ដសារធាតុបំពុលខ្យល់ពីបំពង់ផ្សែងឡចំហាយ ដោយប្រើប្រាស់ឧបករណ៍ Testo 350 ដែលទទួលបានលទ្ធផលឃើញថា បារ៉ាម៉ែត្រCO=១០១២៤ppm មានកម្រិតលើសស្តង់ដា។លើសពីនេះសិប្បកម្មខាងលើបើកដំណើរការដោយគ្មានលិខិតអនុញ្ញាតដំណើរការអាជីវកម្ម និងលិខិតអនុញ្ញាតផ្សេងៗ ពាក់ព័ន្ធនឹងវិស័យបរិស្ថាន។
ទន្ទឹមនឹងការរកឃើញកំហុសរបស់សិប្បកម្មក្រុមការងារជំនាញក្រសួងបរិស្ថានបានចាត់វិធានការចំពោះមុខឱ្យសិប្បកម្មអនុវត្តច្បាប់រួមមាន៖១-ត្រូវបញ្ឈប់ការបញ្ចេញសារធាតុបំពុលខ្យល់ និងក្លិនអាក្រក់។២₋ត្រូវពិន័យអន្តរការណ៍ ករណីមិនមានលិខិតអនុញ្ញាតបើកដំណើរការអាជីវកម្មទាក់ទងការងារបរិស្ថាន និងលិខិតអនុញ្ញាតបញ្ចេញសំណល់ យោងតាមមាត្រា១៥៦ មាត្រា១៧៣ មាត្រា១៧៦ មាត្រា៦៥៤ មាត្រា៦៦៨ នៃក្រមបរិស្ថាននិងធនធានធម្មជាតិ។៣₋ត្រូវស្នើសុំលិខិតអនុញ្ញាតទាក់ទងការងារបរិស្ថាន និងលិខិតអនុញ្ញាតបញ្ចេញសំណល់។៤-ត្រូវកែសម្រួលឡចំហាយឱ្យត្រឹមត្រូវតាមស្តង់ដានៃការបញ្ចេញសារធាតុពុលខ្យល់។៥₋ត្រូវរៀបចំឱ្យមានរោងសម្រាប់ទុកដាក់កាកសំណល់ស្រាបៀរឱ្យបានត្រឹមត្រូវ ដោយជៀសវាសទុកដាក់ចោលនៅទីវាល ដែលអាចបង្កឱ្យមានទឹកសំណល់កាកស្រាបៀរ ប៉ះពាល់ដល់បរិស្ថាន និងដីស្រែប្រជាពលរដ្ឋ និង៦-ត្រូវរៀបចំអាងប្រព្រឹត្តិកម្មសំណល់រាវត្រឹមត្រូវតាមលក្ខណៈបច្ចេកទេស មុនបញ្ចេញសំណល់រាវ៕
