មន្រ្តីយោធាជាន់ខ្ពស់អាមេរិក ព្រមានថា ឆ្លងកាត់សង្គ្រាមអ៊ីរ៉ង់ អាមេរិកមិនអាចការពារអ៊ីស្រាអែលពីមីស៊ីលអ៊ីរ៉ង់ទេ
សង្រ្គាមបង្កឡើងដោយសហរដ្ឋអាមេរិកនិងអ៊ីស្រាអែលលើអ៊ីរ៉ង់ តាំងពីថ្ងៃទី២៨ ខែកុម្ភៈ មិនទាន់អាចរកផ្លូវដោះស្រាយ ឆ្ពោះទៅរកសន្តិភាពនៅឡើយទេ ដោយឧត្តមសេនីយ៍ជាន់ខ្ពស់របស់យោធាសហរដ្ឋអាមេរិកម្នាក់ បានព្រមានថា សង្គ្រាមនៅអ៊ីរ៉ង់មិនអាចធ្វើឱ្យសហរដ្ឋអាមេរិកការពារអ៊ីស្រាអែលពីការវាយប្រហារដោយមីស៊ីលរបស់អ៊ីរ៉ង់បានទេ។ នេះបើយោងតាមកាសែត The Telegraph ផ្សាយនៅថ្ងៃទី០២ ខែសីហា ឆ្នាំ២០២៦ ។
ឧត្តមសេនីយ៍ Alexus Grynkewich ដឹកនាំបញ្ជាការប្រចាំតំបន់អឺរ៉ុបរបស់សហរដ្ឋអាមេរិក បាននិយាយថា ការបិទផ្លូវកងទ័ពជើងទឹកអ៊ីរ៉ង់របស់ លោក ដូណាល់ ត្រាំ ប្រថុយប្រថាននឹងធ្វើឱ្យគាត់មានធនធានតិចជាងមុន ដើម្បីការពារអ៊ីស្រាអែលពីការវាយប្រហារ។
នាវាពិឃាតកងទ័ពជើងទឹកអាមេរិកចំនួន ៥គ្រឿង បំពាក់ដោយរ៉ាដា និងមីស៊ីលដ៏មានអានុភាព ត្រូវបានដាក់ពង្រាយទៅកាន់សមុទ្រមេឌីទែរ៉ាណេភាគខាងកើតជាផ្នែកមួយនៃការការពាររបស់អ៊ីស្រាអែលអស់រយៈពេលជាច្រើនឆ្នាំ។
ប៉ុន្តែបើគ្មាននាវាចម្បាំងមួយផ្សេងទៀត ដែលត្រូវបានពន្យារពេលដោយការបិទផ្លូវរបស់សហរដ្ឋអាមេរិកទេ កងទ័ពអាមេរិកនៅអឺរ៉ុបនឹងត្រូវបង្ខំឱ្យការពារសហរដ្ឋអាមេរិកជាជាងអ៊ីស្រាអែល។ នេះបើយោងតាមការចុះផ្សាយរបស់កាសែត The Washington Post ។
ក្តីបារម្ភរបស់ឧត្តមសេនីយ៍ Grynkewich ត្រូវបានគូសបញ្ជាក់ក្នុងអនុស្សរណៈមួយទៅកាន់មន្ទីរបញ្ចកោណ ក្រោយមកត្រូវបានបែកធ្លាយទៅកាន់ប្រព័ន្ធផ្សព្វផ្សាយអាមេរិក។
នៅក្នុងសមុទ្រអារ៉ាប់ កងនាវាចម្បាំងអាមេរិកមួយគ្រឿង រួមមាននាវាចម្បាំងចំនួន ១១គ្រឿង និងនាវាផ្ទុកយន្តហោះចំនួន ២គ្រឿង ត្រូវបានដាក់ពង្រាយ ជាផ្នែកមួយនៃការប៉ុនប៉ងរបស់ប្រធានាធិបតីអាមេរិកក្នុងការទប់ស្កាត់សេដ្ឋកិច្ចអ៊ីរ៉ង់។
មិនតែប៉ុណ្ណោះ លោក ត្រាំ បានដាក់ចេញនូវទណ្ឌកម្មនេះនៅដើមឆ្នាំនេះ ដើម្បីឆ្លើយតបទៅនឹងការបិទច្រកសមុទ្រ Hormuz របស់ទីក្រុងតេហេរ៉ង់ ដែលធ្លាប់ជាផ្លូវសម្រាប់ប្រេងមួយភាគប្រាំរបស់ពិភពលោក ធ្វើឱ្យតម្លៃប្រេងឡើងថ្លៃយ៉ាងខ្លាំង៕