រដ្ឋមន្រ្តីព័ត៌មានកម្ពុជា ស្នើឱ្យអ្នកកាសែតថៃឈប់ផ្សាយព័ត៌មានមិនពិតពីបញ្ហាព្រំដែន
សៀមរាប៖ ពីវេទិកានៃកិច្ចប្រជុំកំពូលប្រព័ន្ធផ្សព្វផ្សាយអាស៊ីលើកទី២០ និងកិច្ចប្រជុំពាក់ព័ន្ធ (The 20th AMS 2025) នៅខេត្តសៀមរាប លោក នេត្រ ភក្រ្តា រដ្ឋមន្រ្តីក្រសួងព័ត៌មាន បានស្នើឱ្យអ្នកសារព័ត៌មាន ឬបណ្តាញព័ត៌មានថៃ បញ្ឈប់ការផ្សាយព័ត៌មានមិនពិត ដែលនាំឱ្យមានការភាន់ច្រឡំទៅលើបញ្ហាព្រំដែនកម្ពុជា-ថៃ ដែលកំពុងឡើងកម្ដៅ។
ថ្លែងទៅកាន់ក្រុមអ្នកសារព័ត៌មាននៅរសៀលថ្ងៃទី២១ កក្កដា នាសណ្ឋាគារសុខាសៀមរាប លោក នេត្រ ភក្រ្តា បានលើកឡើងថា បណ្ដាញផ្សព្វផ្សាយសារព័ត៌មានថៃ បាននិងកំពុងផ្សព្វផ្សាយព័ត៌មានបែបបំភ្លៃ បំផ្លើស ខុសពីការពិត ដែលបង្កើតឱ្យមានមន្ទិល និងខុសពីការពិតទាក់ទិនទៅនឹងបញ្ហាព្រំដែនកម្ពុជា-ថៃ។ តួយ៉ាងនៅថ្ងៃទី៨ មិថុនា កន្លងទៅ កម្ពុជា-ថៃ បានព្រមព្រៀងគ្នាលើការកែសម្រួលកម្លាំងទ័ពនៅចំណុចមុមបី តែសារព័ត៌មាន Khaosod របស់ថៃបានផ្សាយថាកម្ពុជា ព្រមព្រៀងដកទ័ពនៅចំណុចរស៊ើបនេះទៅវិញ។ នេះបើតាមការបញ្ជាក់ពីលោករដ្ឋមន្រ្តីក្រសួងព័ត៌មាន។
ចំណុចខាងលើនេះ ត្រូវបានលោក នេត្រ ភក្រ្តា អះអាងថា សុទ្ធសឹងជាចេតនារបស់ថៃដែលមានបំណង ផ្សាយព័ត៌មានខុសពីការពិត និងបង្កឱ្យមានការភាន់ច្រឡំទៅលើការយល់ឃើញរបស់សាធារណជន ទាក់ទងនឹងបញ្ហាព្រំដែន។ លោករដ្ឋមន្រ្តីស្នើឱ្យសារព័ត៌មានថៃ ប្រកាន់យកក្រមសីលធម៌វិជ្ជាជីវៈ និងផ្សព្វផ្សាយអ្វីជាការពិត ខណៈដែរគ្រប់គ្នាកំពុងទប់ស្កាត់ការផ្សព្វផ្សាយ និងចែកចាយព័ត៌មានក្លែងក្លាយ។
លោក នេត្រ ភក្រ្តា លើកឡើងដូច្នេះថា៖«អ្វីដែលខ្ញុំស្នើទៅភាគីថៃ ពិសេសគឺប្រព័ន្ធផ្សព្វផ្សាយថៃ គឺសូមឱ្យប្រកាន់នូវក្រមសីលធម៌វិជ្ជាជីវៈសារព័ត៌មានឱ្យបានត្រឹមត្រូវ ការផ្សព្វផ្សាយត្រូវប្រកាន់នូវសច្ចៈភាពនៃព័ត៌មាន ភាពត្រឹមត្រូវនៃព័ត៌មាន ហើយសូមកុំឱ្យបញ្ចូលនូវនិន្នាការនយោបាយនៅក្នុងព័ត៌មានរបស់ខ្លួន»។
លោករដ្ឋមន្រ្តីព័ត៌មានបញ្ជាក់ថា លោកមិនមែនកំពុងបង្រៀនអ្នកព័ត៌មានថៃទេ ប៉ុន្តែពួកគេគួរប្រកាន់យកនូវក្រមសីលធម៌វិជ្ជាជីវៈ ក្នុងនាមអ្នកសារព័ត៌មានមួយរូប ដោយមិនត្រូវផ្សាយព័ត៌មានសម្រាប់តែបំពេញចិត្តពលរដ្ឋរបស់ខ្លួននោះទេ ខណៈដែលប្រជាជនកម្ពុជាទទួលបានព័ត៌មានពិត ដែលចេញដោយប្រព័ន្ធផ្សព្វផ្សាយរបស់កម្ពុជា ដែលវាបង្ហាញថា ភាគីម្ខាងទៀតកំពុងផ្សាយ ព័ត៌មានដែលខុសពីការពិត៕