ឥណ្ឌានិងអាមេរិកសហការគ្នា បាញ់បង្ហោះផ្កាយរណបទំនើបបំផុតដើម្បីថតផែនដី
ផ្កាយរណបដ៏ទំនើបបំផុតមួយ ត្រូវបានបាញ់ចេញពីភាគអាគ្នេយ៍ឥណ្ឌា កាលពីល្ងាចថ្ងៃពុធ ទី៣០កក្កដា ដែលជាលទ្ធផលនៃការសហការផ្គុំនិងស្រាវជ្រាវ រវាងទីភ្នាក់ងារអវកាសអាមេរិក ជាមួយអង្គភាពស្រាវជ្រាវអវកាលឥណ្ឌា។ ផ្កាយរណបពិសេសនេះ នឹងថតរូបភាពលម្អិតបំផុត ដើម្បីតាមដានដំណើរវិវឌ្ឍន៍ប្រែប្រួល របស់ផ្ទៃផែនដីទាំងមូលតែម្តង។ ការតាមដានលម្អិតជាប្រចាំ ដែលអាចអនុញ្ញាតឲ្យអ្នកវិទ្យាសាស្ត្រព្យាករណ៍ដឹងមុន អំពីហានិភ័យគ្រោះមហន្តរាយនានា។
យានដែលដឹកផ្កាយរណប Nisar យកទៅដាក់នៅកំពស់ ៧៤៧គីឡូម៉ែត្រ ពីផែនដី ដើម្បីថតផ្ទៃផែនដីជាប្រចាំ។ បេសកកម្មសហការគ្នា រវាង NASA និង ISRO ។ ស្ថានីយ៍អវកាស Satish Dhawan ភាគអាគ្នេយ៍ឥណ្ឌា ថ្ងៃទី៣០កក្កដា២០២៥ AP
ផ្ការណបទំនើបថ្មីមួយ ឈ្មោះ Nisar ត្រូវបានបាញ់បង្ហោះចេញពីស្ថានីយ៍អវកាស Satish Dhawan រដ្ឋអានដ្រាប្រាដេស ភាគអាគ្នេយ៍ឥណ្ឌា កាលពីថ្ងៃពុធទី៣០កក្កដា វេលាម៉ោង៥និង៤០នាទីល្ងាច។ អ្នកវិទ្យាសាស្ត្រក៏ដូចជាប្រជាជនឥណ្ឌា បានតាមដានការបាញ់បង្ហោះនេះ ដោយក្តីមោទនៈជាទីបំផុត។
សូមបញ្ជាក់ថា ផ្កាយរណប Nisar គឺជាលទ្ធផលសហការគ្នា រវាងទីភ្នាក់ងារអវកាសអាមេរិក NASA និងអង្គភាពស្រាវជ្រាវអវកាសឥណ្ឌា ISRO ដោយបែងចែកបន្ទុកការងារគ្នា ផលិតគ្រឿងផ្សំយកមកផ្គុំចេញជាផ្កាយរណបដ៏ពិសេសនេះ។ ទីភ្នាក់ងារអវកាសអាមេរិក បានចូលរួមចំណាយប្រាក់ចំនួន ១២០០លានដុល្លារ ចំណែកភាគីឥណ្ឌាវិញ ចំណាយចំនួន៩០លានដុល្លារ។
លោកស្រី Karen St-Germain ប្រធាននាយកវិទ្យាសាស្ត្រផែនដី នៅទីភ្នាក់ងារ NASA បានពន្យល់ថា ផ្កាយរណប Nisar បំពាក់ទៅដោយអង់តែនប៉ារ៉ាបូលីក ប្រវែង១២ម៉ែត្រ និងមានបេសកកម្ម ថតរូបភាពយ៉ាងលម្អិតជាទីបំផុតនៅលើផ្ទៃជុំវិញរបស់ផែនដីទាំងមូល។ កម្មវត្ថុនៃបេសកកម្មនេះ គឺតាមដានពិនិត្យនូវរាល់ការផ្លាស់ប្តូរ ការវិវឌ្ឍន៍ប្រែរូបរាង្គរបស់ផែនដី។
ការប្រែប្រួលខ្លះត្រូវការពេលវេលាយូរ យឺតៗ ឯការប្រែប្រួលខ្លះទៀតគឺលឿនរហ័ស និងមានទំហំតិចឬច្រើនមិនដូចគ្នាទេ។ ស្ថិតនៅកំពស់ ៧៤៧គីឡូម៉ែត្រពីផែនដី ផ្កាយរណប Nisar និងថតផ្ទៃផែនដីទាំងមូល ២ដងនៅរៀងរាល់១២ថ្ងៃ អ្នកជំនាញអាមេរិករូបនេះ បានអះអាងថា ទោះបីមានកម្រិតប្រែប្រួលត្រឹមតែប៉ុន្មានសង់ទីម៉ែត្រក៏ដោយ ក៏ផ្កាយរណប នេះអាចថតបានដែរ។ ដូច្នេះអ្នកវិទ្យាសាស្ត្រ អាចព្យាករណ៍ សន្និដ្ឋានដឹងមុនកាន់តែច្បាស់ អំពីសញ្ញាណគ្រោះមហន្តរាយទាំងឡាយ ដូចជាគ្រោះរញ្ជួយដី បាក់រមៀលដី ផ្ទុះភ្នំភ្លើង ឬក៏ការប្រេះបាក់បែកសំណង់ហេដ្ឋារចនាសម្ព័ន្ធធំដូចជាទំនប់ទឹក និងស្ពានថែមជាដើម។
មិនត្រឹមប៉ុណ្ណោះទេ ផ្កាយរណប Nisar អាចថតលម្អិតអំពីផ្ទៃផ្ទាំងទឹកកក កម្រិតរលាយទឹកកក និងសភាពប៉ោងរបស់ផ្ទៃដីនៅតំបន់ប៉ូល ព្រមទាំងភ្លើងឆេះព្រៃផងដែរ។ លោកស្រីបញ្ជាក់ថា ប្រព័ន្ធរ៉ាដាបំពាក់លើផ្កាយរណបនេះ គឺទំនើបនិងពិសេសបំផុត ដែលអាមេរិកមិនធ្លាប់បានស្ថាបនាពីមុនមកទេ។
ដោយឡែកភាគីឥណ្ឌាវិញ បានចូលរួមនៅក្នុងបេសកកម្មនេះ ដើម្បីស្រាវជ្រាវនិងតាមដានលម្អិត អំពីការប្រែប្រួលនៅតាមតំបន់ឆ្នេររបស់ខ្លួ។ បន្ថែមពីនេះ តួលេខប្រមូលបានពីផ្កាយរណបនេះ នឹងអនុញ្ញាតឲ្យឥណ្ឌាអាចដាក់ចុះនូវគោលនយោបាយកសិកម្ម ដែលឆ្លើយតបទៅនឹងភាពជាក់ស្តែង តាមរយៈរូបថតលម្អិតតាមដានសុខភាពដំណាំ និងតាមដានសំណើមរបស់ដីជាដើម។
គួរកត់សំគាល់ថា ប៉ុន្មានឆ្នាំចុងក្រោយនេះ ឥណ្ឌាបានប្រឹងប្រែងចំណាយប្រាក់ច្រើននៅក្នុងកម្មវិធីស្រាវជ្រាវអវកាស។ កាលពីឆ្នាំ២០១៤ ឥណ្ឌាបានបាញ់បង្ហោះបានជោគជ័យនូវឧបករណ៍ស្ទង់ទិន្នន័យមួយ ដាក់បណ្តែតនៅខ្សែគន្លងរបស់ភពព្រះអង្គារ។ ហើយកាលពីឆ្នាំ២០២៣ ឥណ្ឌាបានចុះចតយានរ៉ូបូនៅលើព្រះចន្ទបានជោគជ័យដែរ។
អ្នកអវកាលឥណ្ឌាដំបូងគេឈ្មោះ Shubhanshu Shukla បានឡើងទៅបំពេញបេសកកម្មនៅស្ថានីយអវកាសអន្តរជាតិ ISS ដែលជាដំណាក់កាលចាប់ផ្តើមដ៏សំខាន់ ព្រោះឥណ្ឌាចង់បញ្ជូនមនុស្សទៅអវកាសដោយខ្លួនឯង នៅរវាងឆ្នាំ២០២៧៕