ស្ថានភាពនៅប្រទេសគុយបា កំពុងធ្លាក់ចូលក្នុងវិបត្តិដ៏ធ្ងន់ធ្ងរបំផុត បន្ទាប់ពីរដ្ឋមន្ត្រីក្រសួងថាមពល និងរ៉ែ បានប្រកាសថាអស់ប្រេងម៉ាស៊ូត និងប្រេងឥន្ធនៈ

ស្ថានភាពនៅប្រទេសគុយបា កំពុងធ្លាក់ចូលក្នុងវិបត្តិដ៏ធ្ងន់ធ្ងរបំផុត បន្ទាប់ពីរដ្ឋមន្ត្រីក្រសួងថាមពល និងរ៉ែ បានប្រកាសកាល​ពី​ថ្ងៃ​ពុធ​​ ទី​១៣ ខែ​ឧសភា ថា ប្រទេសនេះបានអស់ប្រេងម៉ាស៊ូត និងប្រេងឥន្ធនៈ សម្រាប់ផលិតអគ្គិសនីទាំងស្រុងហើយ។

វិធានការរឹតត្បិត​ពីសំណាក់សហរដ្ឋអាមេរិក បានធ្វើឱ្យការដឹកជញ្ជូនប្រេងចូលទៅកាន់កោះមួយនេះ ត្រូវកាត់ផ្តាច់ ដែលបណ្តាលឱ្យទីក្រុងឡាហាវ៉ាន កំពុងប្រឈមមុខនឹងការដាច់ចរន្តអគ្គិសនីដ៏អាក្រក់បំផុត ក្នុងរយៈពេលរាប់ទសវត្សរ៍។

តាម​ការ​ចុះ​ផ្សាយ​នា​ថ្ងៃទី​១៤ ឧសភា របស់​ទីភ្នាក់ងារ​ព័ត៌មាន Reuters លោក Vicente de la O រដ្ឋមន្ត្រីក្រសួងថាមពល បានថ្លែងប្រាប់ប្រព័ន្ធផ្សព្វផ្សាយរដ្ឋ ដោយក្តីបារម្ភថា គុយបា​មិនមានប្រេងឥន្ធនៈ ឬប្រេងម៉ាស៊ូតសូម្បីតែមួយតំណក់ នៅក្នុងស្តុកនោះទេ។ លោកបានបញ្ជាក់ថា បណ្តាញអគ្គិសនីជាតិ កំពុងស្ថិតក្នុងសភាព «វិបត្តិខ្លាំង» ដោយមិនមានទុនបម្រុង​អ្វីទាំងអស់។ ក្នុងសប្តាហ៍នេះ ប្រជាពលរដ្ឋនៅទីក្រុងឡាហាវ៉ាន ត្រូវរស់នៅក្នុងទីងងឹតស្ទើរតែទាំងស្រុង ដោយបណ្តាខណ្ឌមួយចំនួនដាច់ចរន្តអគ្គិសនីរហូតដល់ ២០ ទៅ ២២ម៉ោងក្នុងមួយថ្ងៃ ដែលធ្វើឱ្យស្ថានភាពជីវភាពរបស់ប្រជាជន ដែលកំពុងខ្វះខាតចំណីអាហារ ថ្នាំពេទ្យ និងប្រេងឥន្ធនៈស្រាប់នោះ កាន់តែលំបាកទ្វេដង។

បច្ចុប្បន្ន បណ្តាញអគ្គិសនីជាតិរបស់គុយបា ត្រូវពឹងផ្អែកទាំងស្រុងលើប្រេងឆៅក្នុងស្រុក ឧស្ម័នធម្មជាតិ និងថាមពលកកើតឡើងវិញ។ ទោះបីជាគុយបា បានដំឡើងសមត្ថភាពផលិតថាមពលពន្លឺព្រះអាទិត្យបាន ១ ៣០០មេហ្គាវ៉ាត់ក្នុងរយៈពេលពីរឆ្នាំចុងក្រោយនេះក៏ដោយ ក៏ភាពមិនស្ថិតស្ថេរនៃបណ្តាញអគ្គិសនី ដោយសារកង្វះប្រេងឥន្ធនៈ បានធ្វើឱ្យប្រសិទ្ធភាពនៃការផលិតថាមពលធ្លាក់ចុះយ៉ាងខ្លាំង។

រដ្ឋមន្ត្រីរូបនេះ បានបញ្ជាក់​​ទៀត​ថា រដ្ឋាភិបាលគុយបា នៅតែបន្តស្វះស្វែងរកដៃគូ ដើម្បីនាំចូលប្រេង ដ្បិត​ជួបឧបសគ្គពីការបិទខ្ទប់របស់អាមេរិក។ យ៉ាង​ណាមិញ តម្លៃប្រេង និងតម្លៃដឹកជញ្ជូននៅលើទីផ្សារពិភព​លោក ដែលកំពុងកើនឡើង ដោយសារជម្លោះរវាងអាមេរិក-អ៊ីស្រាអែល និងអ៊ីរ៉ង់ កាន់តែធ្វើឱ្យកិច្ចខិតខំប្រឹងប្រែងនេះ មានភាពស្មុគស្មាញ។ ប្រទេសដែលធ្លាប់ជាអ្នកផ្គត់ផ្គង់ប្រេងដ៏សំខាន់ឱ្យគុយបា ដូចជា ម៉ិកស៊ិក និងវ៉េណេស៊ុយអេឡា បានបញ្ឈប់ការដឹកជញ្ជូនប្រេងទាំងស្រុង ចាប់តាំងពីលោក ដូណាល់ ត្រាំ បានចេញបទបញ្ជាប្រតិបត្តិក្នុងខែមករា ឆ្នាំ២០២៦ ដែលព្រមានដាក់ទណ្ឌកម្មលើប្រទេសណា ដែលហ៊ានដឹកជញ្ជូនប្រេងទៅកាន់គុយបា។

គិតចាប់តាំងពីខែធ្នូ ឆ្នាំ​មុន មក មានតែនាវាដឹកប្រេងមួយគ្រឿងប៉ុណ្ណោះ ដែលបានមកដល់គុយបា ក្នុងខែមេសា ដែលជួយសម្រាលការលំបាកបានតែមួយពេលខ្លីប៉ុណ្ណោះ។ ការដាច់ចរន្តអគ្គិសនីនេះ កំពុងតែបង្កផលប៉ះពាល់ដល់សេវាសាធារណៈទូទាំងកោះ ដែលមានប្រជាជនជិត ១០លាននាក់នេះ។ អង្គការសហប្រជាជាតិ កាលពីសប្តាហ៍មុន បានថ្កោលទោស ចំពោះការបិទខ្ទប់ប្រេងឥន្ធនៈរបស់លោក ត្រាំ ដោយចាត់ទុកថាជាសកម្មភាពខុសច្បាប់ ដែលរារាំងសិទ្ធិរបស់ប្រជាជនគុយបា ក្នុងការអភិវឌ្ឍ និងបង្កផលប៉ះពាល់ធ្ងន់ធ្ងរដល់សិទ្ធិទទួលបានអាហារ ការអប់រំ សុខភាព និងអនាម័យ៕