ខេត្តព្រះសីហនុ ជំនន់ទឹកភ្លៀងបន្តធ្លាក់មិនឈប់ឈរ បង្កឱ្យលំនៅឋានពលរដ្ឋ១៧ខ្នងរងការលិចលង់
ខេត្តព្រះសីហនុ ៖ យ៉ាងហោចណាស់ លំនៅឋានប្រជាពលរដ្ឋចំនួន១៧ខ្នង/ផ្ទះ នៅចំណុចទល់មុខរោងចក្រផលិតសំបកកំប៉ុងក្រោន ស្ថិតក្នុងក្រុម២៥-២៦ ភូមិ០១ សង្កាត់លេខ០១ ក្រុងព្រះសីហនុ ខេត្តព្រះសីហនុ ត្រូវបានលិចលង់ទាំងស្រុង ខណៈជំនន់ទឹកភ្លៀងនៅតែបន្តធ្លាក់មិនឈប់ឈរ ។
ប្រជាពលរដ្ឋដែលរងការលិចលង់លំនៅឋានទាំង១៧ខ្នងផ្ទះ បានត្អូញត្អែរដោយក្តីកង្វល់អំពីការលំបាករបស់ពួកគាត់ឱ្យដឹងៗគ្នាថា ប៉ុន្មានឆ្នាំចុងក្រោយនេះ បន្ទាប់ពីក្រុមហ៊ុនទឹកស្អាតអានកូរលើកជាទំនប់ធ្វើជាអាងស្តុកទឹក នៅខាងក្រោយភូមិឋានរបស់ពួកគាត់ ដើម្បីតំកល់ទឹកទុកសម្រាប់ផ្គត់ផ្គង់ ជាលទ្ធផលធ្វើឱ្យលិចលង់ដល់លំនៅឋានរបស់ពួកគាត់នារដូវវស្សាដែលមានទឹកជំនន់ ។
លោកឌី ឌុំ ប្រធានភូមិ០៣ សង្កាត់លេខ០១ ក្រុងព្រះសីហនុ ខេត្តព្រះសីហនុ បានឲ្យដឹងថា ទាក់ទងទៅនិងករណីទឹកជំនន់ បង្កឲ្យមានការលិចលង់ផ្ទះប្រជាពលរដ្ឋចំនួន១៧ខ្នងផ្ទះ ដោយសារតែអាងស្តុកទឹកក្រុមហ៊ុនអានកូរបើកទាររំដោះទឹកតូចពេក ទឹកហូរមិនទាន់ទើបបណ្តាលឲ្យមានការលិចលង់បែបនេះ ហើយលោកបានធ្វើរបាយការណ៍ជូនលោកចៅសង្កាត់ ដើម្បីឆ្លងជូនលោកអភិបាលក្រុងព្រះសីហនុ ដើម្បីស្វែងរកដំណោះស្រាយហើយ ។ ដោយឡែក ក្រុមហ៊ុនអានកូ អ្នកយកព័តមានយើងមិនអាចរកការបកស្រាយណាមួយបានទេ ដោយសារមិនមានលេខទូរស័ព្ទ ៕