សេដ្ឋកិច្ចបណ្តាប្រទេសអារ៉ាប់ខាត ១៥០ប៊ីលានដុល្លារក្នុងខែដំបូង ដោយសារសង្គ្រាមអាមេរិក-អ៊ីរ៉ង់
សង្គ្រាមរបស់សហរដ្ឋអាមេរិកប្រឆាំងនឹងប្រទេសអ៊ីរ៉ង់ និងការសងសឹករបស់ទីក្រុងតេហេរ៉ង់ ទៅលើបណ្តាលប្រទេសក្នុងឈូងសមុទ្រ រួមទាំងការបិទច្រកសមុទ្រហ័រមូស ធ្វើឱ្យសេដ្ឋកិច្ចបណ្តាប្រទេសក្នុងតំបន់អារ៉ាប់ខាតបង់ប្រាក់ជិត ១៥០ប៊ីលានដុល្លារក្នុងរយៈពេលត្រឹមតែមួយខែដំបូងប៉ុណ្ណោះ ស្មើនឹងជិត ៤ ភាគរយនៃផលិតផលក្នុងស្រុកសរុប (GDP) របស់តំបន់។ នេះបើតាមសេចក្តីថ្លែងការណ៍របស់គណៈកម្មការអង្គការសហប្រជាជាតិ(UN)។
សេចក្តីថ្លែងការណ៍នេះជាផ្នែកមួយនៃសុន្ទរកថាថ្លែងកាលពីថ្ងៃព្រហស្បតិ៍ ដោយ លោកស្រី Rania Al-Mashat អគ្គលេខាធិការរងនៃអង្គការសហប្រជាជាតិ និងជាលេខាធិការប្រតិបត្តិនៃគណៈកម្មការសេដ្ឋកិច្ច និងសង្គមសម្រាប់អាស៊ីខាងលិច(ESCWA) ក្នុងកិច្ចប្រជុំមួយរបស់ក្រុមប្រឹក្សាសន្តិសុខតាមទម្រង់ «Arria-formula» រៀបចំឡើងដោយប្រទេសបារ៉ែន។
លោកស្រី Al-Mashat លើកឡើងថា៖ « សូមអនុញ្ញាតឱ្យខ្ញុំលើកឡើងនូវតួលេខដ៏គួរឱ្យកត់សម្គាល់មួយនៅទីនេះ។ យោងតាមការប៉ាន់ប្រមាណរបស់ ESCWA ឱ្យដឹងថា ថ្លៃចំណាយបណ្តាលមកពីជម្លោះតែមួយមុខគត់ អំឡុងខែដំបូងបានកើនឡើងដល់ ១៥០ប៊ីលានដុល្លារ ស្មើនឹង ៤ភាគរយនៃផលិតផលក្នុងស្រុកសរុប(GDP) របស់តំបន់»។
ប្រទេស ESCWA មានសមាជិកជាប្រទេសអារ៉ាប់ចំនួន ២១ លាតសន្ធឹងចាប់ពីតំបន់អាហ្វ្រិកខាងជើង រហូតដល់តំបន់មជ្ឈិមបូព៌ា។
គួរបញ្ជាក់ថា សហរដ្ឋអាមេរិកបានចូលរួមជាមួយអ៊ីស្រាអែលក្នុងការវាយប្រហារលើប្រទេសអ៊ីរ៉ង់ នៅថ្ងៃទី២៨ ខែកុម្ភៈ។
ការវាយប្រហារបើកឆាកនោះបានសម្លាប់មេដឹកនាំកំពូលអ៊ីរ៉ង់ដែលកាន់អំណាចយូរឆ្នាំ គឺលោក Ali Khamenei ព្រមទាំងមេដឹកនាំជាន់ខ្ពស់ផ្នែកយោធា និងនយោបាយច្រើនរូបទៀត រួមជាមួយនឹងជនស៊ីវិលរាប់រយនាក់ ក្នុងនោះមានស្ត្រី និងកុមារជាច្រើនផងដែរ។
មិនតែប៉ុណ្ណោះ ការស៊ើបអង្កេតមួយ គាំទ្រដោយអង្គការសហប្រជាជាតិ បានរកឃើញថា ទីក្រុងវ៉ាស៊ីនតោនបានប្រព្រឹត្តឧក្រិដ្ឋកម្មសង្គ្រាមនៅអ៊ីរ៉ង់ អំឡុងពេលរលកដំបូងនៃការវាយប្រហារ៕