ក្រុមហេសបូឡា ព្រមានទុកពេលឱ្យអ៊ីស្រាអែល ២ខែ ដើម្បីដកទ័ពចេញពីលីបង់

លោក Mohammad Raad ដែលជាមេដឹកនាំជាន់ខ្ពស់ម្នាក់របស់ក្រុមហេសបូឡា បានចេញមុខព្រមានចំៗទៅកាន់ប្រទេសអ៊ីស្រាអែល ដោយ​បញ្ជាក់យ៉ាងម៉ឺងម៉ាត់ថា អ៊ីស្រាអែលមានពេលត្រឹមតែ ៦០ថ្ងៃប៉ុណ្ណោះ ដើម្បីបញ្ឈប់ការឈ្លានពាន និងដកកងទ័ពទាំងអស់ចេញពីទឹកដីលីបង់។

តាម​ការ​ផ្សាយរបស់​សារព័ត៌មាន TRT World នា​ថ្ងៃទី​១៩ ខែមិថុនា ឆ្នាំ​២០២៦ ការព្រមាននេះ បានធ្វើឡើងចំពេលដែលកងទ័ពអ៊ីស្រាអែល នៅតែបន្តវាយប្រហារលើលីបង់ជារៀងរាល់ថ្ងៃ និងបដិសេធ​ដក​កម្លាំងចេញ​​ពីតំបន់ភាគខាងត្បូង បើទោះបីជាមានកិច្ចព្រមព្រៀងថ្មីមួយរវាងអាមេរិក និងអ៊ីរ៉ង់ ដែលតម្រូវឱ្យមានការបញ្ឈប់សង្គ្រាមភ្លាមៗក៏ដោយ។

ទន្ទឹមនឹងការព្រមាននេះ លោក Raad ក៏បានជំរុញ​ឱ្យរដ្ឋាភិបាលលីបង់ ពិនិត្យមើលកិច្ចព្រមព្រៀងរវាងអាមេរិក និងអ៊ីរ៉ង់នោះឱ្យបានច្បាស់លាស់ និងកុំមើលស្រាលលើសមត្ថភាពរបស់ប្រទេសអ៊ីរ៉ង់ ក្នុងការទប់ទល់ជាមួយអ៊ីស្រាអែលឱ្យសោះ បើអ៊ីស្រាអែលនៅតែរឹងរូសបំពានកិច្ចព្រមព្រៀង។ កិច្ចព្រមព្រៀងដែលទើបតែចុះហត្ថលេខាដោយប្រធានាធិបតីអាមេរិក លោក ដូណាល់ ត្រាំ និងប្រធានាធិបតីអ៊ីរ៉ង់ លោក Masoud Pezeshkian កាលពី​ថ្ងៃ​ព្រហស្បតិ៍ គឺធ្វើឡើងក្នុងគោលបំណងបញ្ចប់ជម្លោះ និងធានាដល់បូរណភាពទឹកដីរបស់លីបង់ ប៉ុន្តែវាក៏តម្រូវឱ្យអាមេរិក និងអ៊ីរ៉ង់ចរចាគ្នារយៈពេល ៦០ថ្ងៃបន្តទៀតផងដែរ។

ជាងនេះទៅទៀត មេដឹកនាំហេសបូឡា​រូបនេះ បានដាស់តឿនរដ្ឋាភិបាលលីបង់ កុំឱ្យជួបចរចាផ្ទាល់ជាមួយអ៊ីស្រាអែល ក្នុងបំណងមករំលាយក្រុមហេសបូឡាឱ្យសោះ ព្រោះវាគ្មានចំណេញអ្វីដល់ប្រទេសជាតិឡើយ ហើយលោកក៏បានសង្កត់ធ្ងន់ថា ផែនការកម្ទេច​ក្រុមហេសបូឡារបស់អ៊ីស្រាអែលគឺបានបរាជ័យទាំងស្រុងទៅហើយ។ ការលើកឡើងបែបនេះ បានកើតឡើងមុនពេលដែលលីបង់ និងអ៊ីស្រាអែល គ្រោងនឹងជួបចរចាគ្នាជាលើកទីប្រាំនៅសប្តាហ៍ក្រោយ ដោយកាលពីជុំមុន ភាគីទាំងពីរធ្លាប់បានព្រមព្រៀងគ្នាថានឹងឈប់បាញ់ បើសិនជាក្រុមហេសបូឡាព្រមដកថយពីតំបន់ព្រំដែន។

មុនការប្រកាសរបស់ក្រុមហេសបូឡា ប្រធានាធិបតីលីបង់ លោក Joseph Aoun ក៏បានជួបណែនាំដល់ក្រុមការងារចរចារបស់ខ្លួន មុនពេលពួកគេចេញដំណើរទៅកាន់ទីក្រុងវ៉ាស៊ីនតោនផងដែរ។ លោកប្រធានាធិបតី បានបង្គាប់ឱ្យក្រុមការងារប្រកាន់ជំហររឹងមាំ ដោយទាមទារឱ្យមានការឈប់បាញ់ជាអចិន្ត្រៃយ៍ ឱ្យអ៊ីស្រាអែលដកទ័ពចេញ ដោះលែងអ្នកទោសលីបង់ និងចាប់ផ្តើមស្តារប្រទេសឡើងវិញ។

សូម​ជម្រាប​ថា គិតចាប់តាំងពីដើមខែមីនាមក ការទម្លាក់គ្រាប់បែករបស់អ៊ីស្រាអែល បានធ្វើឱ្យប្រជាជនលីបង់ជិត ៤ ០០០នាក់បាត់បង់ជីវិត របួសជាង ១ម៉ឺននាក់ និងជាង ១លាននាក់ត្រូវរត់ភៀសខ្លួនពីផ្ទះសម្បែង ខណៈដែលកងទ័ពអ៊ីស្រាអែល បានវាយលុកចូលជ្រៅក្នុងទឹកដីលីបង់ជាង ១០គីឡូម៉ែត្រទៅហើយ៕