លោក ត្រាំ អះអាង ពីអំណាចគ្មានដែនកំណត់ ក្រោយកិច្ចព្រមព្រៀងចុះហត្ថលេខារួច
ប្រធានាធិបតីសហរដ្ឋអាមេរិក លោក ដូណាល់ ត្រាំ បានលើកឡើងថា លទ្ធភាពរបស់លោក គ្មានដែនកំណត់នោះទេក្នុងការប្រើប្រាស់អំណាច បន្ទាប់ពីការចុះកិច្ចព្រមព្រៀងអាមេរិក-អ៊ីរ៉ង់ ដើម្បីបញ្ចប់សង្គ្រាមបណ្តោះអាសន្ន និងបើកផ្លូវចរចា ដោយអះអាងថា សហរដ្ឋអាមេរិកមានយោធាដ៏ខ្លាំងបំផុតនៅលើពិភពលោក។
ក្នុងបទសម្ភាសន៍មួយជាមួយសារព័ត៌មាន Axios ចេញផ្សាយ កាលពីថ្ងៃព្រហស្បតិ៍ ទី១៨ ខែមិថុនា លោក ត្រាំ ត្រូវបានអ្នកសារព័ត៌មានសួរថា៖ « តើលោកបានរៀនអ្វីខ្លះអំពីការអនុវត្ត និងដែនកំណត់នៃអំណាចជាប្រធានាធិបតី ដែលចេញជាលទ្ធផលនៃជម្លោះនេះ»?
លោកឆ្លើយតបថា៖ « គ្មានដែនកំណត់ទេ។ ខ្ញុំមិនទាន់បានរៀនមេរៀននោះនៅឡើយទេ។ ខ្ញុំដឹងថាមាន ប៉ុន្តែគ្មានដែនកំណត់។ យើងបានកម្ចាត់ពួកគេ[អ៊ីរ៉ង់] ទាំងស្រុងដោយយោធា»។
លោក ត្រាំ បន្ថែមថា៖ « យើងមានយោធាដ៏មានឥទ្ធិពលបំផុតនៅលើពិភពលោក។ តើអ្នកណាទៀតអាចធ្វើការបិទផ្លូវបែបនេះ[ច្រកហ័រមូស] បាន? ខ្ញុំបានធ្វើការបិទផ្លូវកងទ័ពជើងទឹក ដែលគ្មានកប៉ាល់ណាមួយអាចឆ្លងកាត់បាន។ ខ្លះបានព្យាយាម។ អ្នកដឹងទេ! ពួកគេធ្វើមិនបានទេ[…]។
ពេលអ្នកសារព័ត៌មានសួរថា៖ « តើអនុស្សរណៈនៃការយោគយល់គ្នាដែលបានចុះហត្ថលេខា ក្នុងសប្តាហ៍នេះរវាងសហរដ្ឋអាមេរិក និងអ៊ីរ៉ង់ មានចំនួនស្មើនឹងការចុះចាញ់ដោយគ្មានលក្ខខណ្ឌ ដែលលោកចង់បានដំបូងពីទីក្រុងតេហេរ៉ង់ឬអត់»?
លោក ត្រាំ ឆ្លើយតបថា៖ « មែនហើយ! វាពិតជាប្រហែលជាការចុះចាញ់ ដោយគ្មានលក្ខខណ្ឌ»។
គួរបញ្ជាក់ថា ចាប់តាំងពីលោក ដូណាល់ ត្រាំ និងភាគីអ៊ីរ៉ង់ ចាប់ផ្តើមយល់ព្រមលើកិច្ចព្រមព្រៀងលើបទឈប់បាញ់ មានអន្តរជាតិ និងសម្ព័ន្ធមិត្តជាច្រើនបានស្វាគមន៍យ៉ាងពេញលេញ ព្រោះការបើកច្រកហ័រមូសនឹងជួយសេដ្ឋកិច្ចពិភពលោករស់ឡើងវិញ៕